Museo San Pio X - Salzano - www.museosanpiox.it

Home > Chi è San Pio X > Vita di San Pio X in lingua veneziana

EL PAPA PIO X (Vita di San Pio X in lingua veneziana)

Premésa

El 4 de agosto del 1903 i cardinài ga sièlto come papa Giuseppe Sarto che, apéna elèto, el già tolto su el nome de Pio X, par ricòrdo de tùti i papi de sto nome che gavéva sofrìo nel Setessénto e durante tùto l'Otossénto, a partire da Pio VI (Giovanni Angelo Braschi, 1717-99), el papa deportà in Francia, e da Pio VII (Barnaba Chiaramonti, 1842-1823), el papa martorià da Napoleone, par fenìre co Pio IX (Giovanni Maria Mastai-Ferretti, 1792-1878), el papa déa présa de Roma el 20 de seténbre del 1870.

El gèra el cardinàe patriarca de Venèssia, che nissùni gavarìa descomésso sóra de iù che el sarìa deventà papa: el xé sta l'unico papa déa storia déa Césa che ga passà tùti i scaìni del ministèro dei prèti, parché el xé stà l'unico papa che xé stà ànca pàroco, e invesse cheàltri no, né prima né dopo de iù, parché i gèra stài o de famégia nòbie, o diplomàtici de carièra, opùre insigni rapresentànti de Ordini Reigiósi.

El 4 de agosto 2003 cascarà i primi sento àni de sta elessión, e xé giusto ricordàre sta persona, che xé sta el primo papa del XX sècoeo, el primo dei tre patriarchi de Venèssia de sto sècoeo che xé deventài papa (Giuseppe Sarto, Angelo Giuseppe Roncalli e Albino Luciani), e che ga governà la Césa verso el nòvo Miènio Cristiàn.

I Sarto dal Quatrossénto a l'Otossénto

I Sarto xé rivài a Riese sóeo ne a seconda metà del Setessénto: pàea precision, i se ga stabiìo a Riese fin dal 1763, quando che i xé vegnùi da Castèo de Godego, on paése vissìn, che dèsso xé in provincia e in diocesi de Treviso.

Sto ramo de sénte, diretamente coegà co Bepi Sarto, el papa Pio X, el se ga estinto nel 1930, quando che xé morta Maria Sarto, l'ultima de e so sorele restàe da sposare.

Le rissérche fate so l'àlbaro genealògico da Francesco Franceschetti ¹, da Angelo Marchesan ² e da Antonio Gheno ³ e porta tùte àea conclusión che i Sarto fusse vegnùi fòra da Villa Estense (Padova): par sta afermassión qua i tira in bàeo na documentassión che no xé senpre esàta, e che i fa ndare indrìo nel ténpo fin àea fine del Quatrossénto.

Un ramo de a famégia se ga trapiantà da sto posto a San Giorgio in Brenta, on paeséto picenìn che se trova née vicinanse de Sitadèa, che dèsso xé in provincia de Padova e in diocesi de Vicensa. E so strùssie ghe xé in parte bastànsa ben conossùe.

Qua xé nato ànzolo Sarto (1721?-1784), che se ga sposà el 22 de màgio 1761 a Castèo de Godego co Antonia Liviero, che gèra restà vedova de Zamaria Fratin.

Sicóme no i gèra pì sóvani (i gavéva tùti do na età de sìrca quaranta ani), dal so matrimonio xé nato pròpio par misericordia Giuseppe Sarto (1762-1841), l'unico so fiòeo che se gàbia notissie e che se ga trovà conferma sói documenti che ancora esiste a Castèo de Godego e a Riese ⁴.

Xé pròpio da sti documenti che se sa che on àno pì tardi, nel 1763 ⁵, ea famégia se ga trasferìo par senpre da Castèo de Godego a Riese.

In sto paese Giuseppe Sarto xé sta considerà on possidente, el xé sta cursór comunàe e el se ga sposà co Paola Giacomello (1765-1837).

In 25 àni, fra el 1784 e el 1809, da sto matrimonio xé nati in tùto 11 fiòi, 6 fémene e 5 mas-ci. Sóeo siè de eóri xè sopravissùi.

El quarto in órdine de nassita xé sta Giovanni Battista (o Giambattista o Gio:Batta) Sarto (1792-1852), el pàre del futuro papa ⁶.

Giuseppe Sarto xé ndà de capeàn, e co so mugèr Paola Giacomello el ga abità la casa de so madóna, Angela Girardi, paróna de quéa che dòpo do sècoi xé deventàda ea “caséta nadàe de papa Pio Decimo”.

Ea so famégia no gèra poaréta, perché a gavéva diverse proprietà: do case e siè ètari de terén ⁷.

Ea división del patrimonio de famégia fra i siè fiòi sopravissùi, che no xé senpre fàssie da capìrse sói documenti, ga portà Giovanni Battista a èssare parón de na casa (quéa che xé nato el futuro papa Pio X, che ghe provegnìva da l'eredità de Angela Girardi, so nòna del papa da la parte de so mama) e de do canpi.

Giovanni Battista Sarto gavéva squàsi 41 àni quando che el ga sposà, el 13 de febràro del 1833, Margherita Sanson (1813-1894): a sposa ghe ne gavéva sóeo vìnti, e e so nòsse xé stàe benedìe dal capeàn de Riese, don Pier Paolo Pellizzari (S. Vito d'Asolo, 1807 - Vallà, 1875).

El sposo gèra, come so pàre, possidente e cursor comunàe; so mugèr invésse, che gèra tanto sóvane, la gèra nata a Vedeàgo, poco distate da Riese: la gèra la fiòea “ileteràta” (che vóe dire inalfabéta), de on òsto, Melchiore Sanson (1786-1870) e la gèra, come so màma, Maria Antonini, na “cucitrice” (na sartóra).

L'infànsia e l'adoessénsa de Giuseppe Sarto

Fra el 1834 e el 1852, néi 19 àni che xé durà el so matrimonio, Giovanni Battista Sarto e Margherita Sanson i ga vùo 11 fiòi: fra questi el futuro papa gèra quéo che gèra nato par secondo.

In squàsi tùte le biografie ghe ne xé riportài sóeo dièse, in ordine déa data de nassita: Giuseppe (31 genàro 1834 - 6 febràro 1834), Giuseppe Melchiore (2 giugno 1835 - 20 agosto 1914, el papa), Angelo (26 màrso 1837 - 9 genàro 1916), Teresa (26 genàro 1839 - 27 màgio 1920), Rosa (12 febràro 1841 - 11 febràro 1913), Antonia (26 genàro 1843 - 2 màrso 1917), Pierluigi (o Pier Luigi, 26 genàro 1845 - 6 febràro 1845), Maria (26 aprìe 1846 - 30 màrso 1930), Lucia (29 màgio 1848 - 19 giugno 1924), Anna (4 aprìe 1850 - 29 màrso 1926), Pietro Gaetano (30 aprìe 1852 - 30 otóbre 1852) ⁷.

Giuseppe Melchiore Sarto xé aeóra nato el 2 de giugno 1835 e el giorno dopo, el 3 de giugno del 1835, el xé sta batisà dal capeàn don Pier Paolo Pellizzari, che poco pì de do àni prima gavéva sposà i so genitori.

Giuseppe Sarto xé nato quando che el Veneto gèra sóto l'Austria, parché el gèra sta assegnà àea sfera de influensa de l'impero austro-ungarico, secondo e decisión del Congresso de Vienna (1815). El putèo gèra tanto bravo a scuòea: tante volte el sostituiva ànca el so maestro, Francesco Gecherle. El gèra svéio, e el mostrava sà da alóra on carattere vivacéto, inpulsivo e ànca màsa rigoroso par ea so età e, oltre a savére lèsare e scrìvare, el ga inparà ànca a rispóndare Messa, a cantare in coro. Insóma, so na paròea sóea, el ga scomissià a ndare par ciésa. No el mancava mai àea dotrìna cristiana, al catechismo e àe altre àltre istrussión de reigión ⁸.

Ogni giorno el ndava a pregare al santuario de la Madòna de le Sendròe, a pieve matrìsse de tùte e paròchie là torno, e fin da l'infansia el se ga sentìo ciamà a deventare prete.

El paróco don Tito Fusarini (Mestre, 1812-Venèssia, 1877), paróco de Riese dal 1842 al 1853, oltre che al studio déa dottrina cristiana, lo ga indirissà, forse nel 1844, al studio del latìn, materia che po ghe ga insegnà el capeàn don Luigi Orazio, morto a Santandrà (Treviso) nel 1884, l'àno che el so alièvo xé deventà vescovo.

El ga po ciapà el sacramento déa cresema, che in chel tenpo vegnìva prima dèa aministrassión déa comunión, a Asolo, a 10 àni, el 1° de seténbre 1845, dae man del vescovo Giovanni Battista Sartori Canova, e el xè stà messo àea prima comunión a 11 àni el 6 de aprìe 1846 ⁹.

El 22 de agosto 1846 el ga sostegnùo come privatista l'esame di ciùsa dei studi déa scuòea elementare néa “scuola elementare maggiore di Treviso”, e po dopo el ga scomissià a ndare al ginàsio de Castelfranco.

El ghe ndava ogni giorno, ànca se el gèra distante da Riese 7 chilometri.

El ndava a pìe, e dée volte coi sòcoi sue spàe, par no consumarli, opùre co pasàgi sui càri che ndava a Castelfranco. Ogni siè mesi el gaveva da sostegnére l'esame al seminario de Treviso, dove che el risultava sénpre el primo de tùti e col massimo dei voti.

El ga frequentà quèa scuòea de Castelfranco da l'autùno del 1846 a l'istà del 1850. Pàr disnàre a mèsodì el ndava néa famégia de Giovanni Battista Finazzi, esatór dée tàsse nel Distréto de Castelfranco: qua qualche volta el si fermava ànca par dormire e par darghe qualche ripetissión privata ai putèi de Finazzi.

àea fine déa quarta ginsiàe el xé risultà primo ancora na volta: el ga cosìta coronà, a pieni voti, i so studi nel 1850, al seminario de Treviso, che gèra l'unico istituto déa diocesi che gavésse podùo atestàre el valore legale dei studi sostegnùi co on esame: el xè risultà “eminente” in tùte le materie studiàe, e el xé stà el primo fra i 43 aiùni concorénti privati, che vegnìva dai vari eòghi déa provincia de Treviso.

El sarà sénpre, e sensa nissùna ecessión, el “primo déa classe”.

Ea so famégia, poaréta come che o gèra tante altre in chei ténpi, no a gèra sèrto fra e famége pì poaréte de Riese: ea gèra na famégia unìa, patriarcàe, una dée numerosissime famége de “catòici” de Riese, che fasséva parte déa paròchia de S. Matìo e che viveva intensamente ea so fede in Dio.

Quèa de Riese gèra una dée paròchie pì omogenee pà quél che riguarda la fede cristiana: ea gèra intessùa de osservanse reigióse e devossionài, che pròpio e se nutriva de quéo che se semenava tra e famége, e a gaveva el primato di vére na percentuàe bassisima de “inconfessi”, che vorìa dire quéi che no se acostàva ai sacramenti gnànca a Pasqua: i gèra poco pì de l'uno par sénto. Ea paròchia ea se distinguéva e la se segnaeàva par la gran pietà reigiosa: a Riese la rete dée confraternite la gèra “densissima” ¹⁰.

El papà de Bèpi Sarto, el cursór comunàe Giovanni Battista Sarto, no gèra miga màssa contento che so fiòeo deventasse prète e el ndasse vànti coi studi ¹¹.

Panorama de Riese Pio X (Treviso).

A casa nadàe de Giuseppe Sarto. El xé nato el 2 de giugno 1835, fiòeo de Giovàni Batìsta (1792-1852), cursór comunàe del paese, e de Margherita Sanson (1813-1894), sartóra ileteràta e inalfabeta. Nel cortìvo a mèsogiorno i ga costruìo nel 1935 on museo che mostra i simèi del papa santo.

 

In seminario de Padova (13 de novenbre 1850-14 de agosto 1858)

Par podére permétare a Giuseppe Sarto el prosièguo dei studi xé intervegnùo el cardinàe e poeta Jacopo Monico (1778-1851), natìvo de Riese, fiòeo de Adamo Monico, maniscalco e fàbro, e de Angela Cavallin: da prinsìpio el xé sta profesór del seminario de Treviso, e po dopo el xé deventà paróco de S. Vito d'Asolo (sièlto nel 1818 da tùti i capi famégia del posto); dopo el xé sta nominà da Pio VII vescovo de Ceneda el 16 de màrso del 1823, e àea fine el xé deventà patriarca di Venèssia nel 1827 (el ga fàto l'entrata l'8 de seténbre) e qua el xé restà fin al 1851, àno de la so morte, che xé avegnùa el 25 de aprìe ¹².

El 28 de agosto 1850 ghe xé rivà àea famégia dei Sarto a Riese la comunicassión che el sóvane Giuseppe podéva entrare nel Seminario de Padova e ocupàre el posto gratuito previsto dal coègio Tornacense Campion ¹³.

El 19 de seténbre 1850, a 15 àni, el se ga vestìo co l'abito clericàe e el 13 de novenbre 1850 el ga fàto la so entràda definitiva nel seminario de Padova, che gèra stà riformà da S. Gregorio Barbarigo (1625-1697), vescovo de quéa sità dal 1664 alla morte.

El zóvane seminarista xé sénpre restà in comunicassión a mèso de létara co i so prèti de Riese, in particoeàre col capeàn don Pietro Jacuzzi (Artegna, 1819-Treviso, 1902).

Dopo el primo àno de scuòea in seminario el xé sta giudicà “primo co tùte eminénse”: ea stessa identica situassión scoeàstica se ga sénpre presentà, co rigorosa puntuaità, da l'àno 1850 al 1858, quando che el ga sostegnùo tùto el curriculum dei studi ginasiài, liceài e teologici.

El se ga subito segnaeà, oltre che par le so capassità inteetuài, ànca par el fàto che el gavéva na forte personaità: a 19 anni el xé sta ritegnùo dai so superiori bón de funsionàre da “primo prefèto” de cameràta par i chièrici, fra el 1854 e el 1858.

Sta inconbénsa eo obligava a scrìvare dei giudissi sui so conpagni de seminario, e el gavéva da evidensiàre i punti pì inportànti e essensiài del caràtere de ogni uno: i storici ga individuà in iù na capassità del tùto singoeàre de capire l'ànemo dée persone umane ¹⁴.

Nel seminario de Padova el ga curà sóra de tùto el latìn e ea musica sacra. El so intarèse per questa ultima xé sta veramente gràndo: el se ga parfìn simentà néa composissión de 15 tòchi musicài par la Setimàna Santa, e el xé sta sièlto come maestro de musica dei chierici e el xé elèto diretór déa Capèa Musicàe del seminario stéso ¹⁵.

Née matèrie de scuòea el xé risultà sénpre fra i primi, e in particoeàre el xé sta un eceénte studente de latìn e de matematica, un poco manco in fiosofìa: in latìn nol podéva no èssarlo, no sóeo pàe so notévoi capassità, ma ànca parché el gèra studénte so na scuòea iluminàda dàea geniaità umanìstica de Egidio Forcellini (Campo, Alano di Piave, Belluno, 1688-1768), el famoso autore del Lexicon totius latinitatis, quél gran vocaboeàrio de paròe latìne, ussìo nel 1771, tre àni dopo che el gèra morto.

Siè àni prima di rissévare el sacramento de l'ordine sacro, ea vita del sóvane seminarista improvìsamente xé diventà pì difìssie a causa déa morte de so pàre Giovanni Battista Sarto, morto el 4 de màgio del 1852. E quel stéso àno xè sta ànca de pì doeoroso par ea morte de so fradeéto pì pìcoeo, quéo nato ultimo, Pietro Gaetano, pròpio 4 giorni prima déa morte de so pàre, che el gavèva conpìo ormai sesànta àni. El picenìn xé po morto sóeo siè mesi dopo de sta data, el 30 de otóbre del 1852.

Tra el 1855 e el 1858 el xé sta amésso ai vari gradi déi ordini eclesiàstici, in seminario de Treviso, dal vescovo Giovanni Antonio Farina (Gambellara, 1803-Vicenza, 1888), el fondatór dée suòre dorotèe: dapprima ài ordini minori (ostiariàto e letoràto, 22 dissénbre 1855; esorcistàto e acóitàto, 6 giugno 1857), e po dopo ai ordini magióri (sudiaconàto, 19 seténbre 1857, e diaconàto, 27 febràro 1858).

El ga ricevùo el sacramento de l'ordine sacro el 18 de seténbre 1858, nel duomo de Castelfranco Veneto, dàe man del vescovo Farina, che squàsi tre àni dopo, nel 1861, xè sta trasferìo a Vicensa. El gavéva poco pì de 23 àni, uno de manco de l'età che ghe voéva: par deventare prète el ga dovùo domandare àea Santa Sede ea dispensa.

El giorno dopo, el 19 de seténbre 1858, el ga cantà la so prima messa a Riese, davanti al pòpoeo in festa.

Capeàn de Tombolo (novenbre 1858-màgio 1867)

Del seminario de Padova el ga conservà sénpre un òtimo ricordo, e a Venèssia, nel dissénbre del 1894, oramai cardinàe e patriarca, el se ga esprèsso quaificàndo i òto àni de Tombolo come “i àni pì bèi déa me vita”, pròpio come Galileo Galilei el ga considerà el periodo passà a Padova (1592-1610) come “li 18 anni migliori di tutta la mia età” ¹⁶.

Infàti, come capeàn el xé sta destinà a Tombolo, na paròchia in provincia de Padova, ai confini déa diòcesi de Treviso, a pochi chiòmetri da Sitadèa, la “sità turìa”e circondàda de muri e de tóri co i mèrli, ea prima comunità paròchiae déa diòcesi de Padova.

Ea césa parochiàe, dedicàda a S. Andrea apòstoeo, gavéva fedéi che viveva so on teritòrio controeà economicamente e poìticamente dal conte Giovanni Cittadella.

I Tomboeàni gèra néa stragràn magiorànsa sensài e marcànti de bestie.

Ma nonostante el reàtivo benèssare, che gèra comportà da l'inissiatìva privata e da on marcà unico o squàsi nel so gènare, ànca a povertà gavéva a so incidensa, se a Tombolo el pretìn e capeàn novèo ga scomissià a darghe àea sénte pì poaréta el forménto che ghe spetàva a iù par ea so funsión sacerdotàe che el svolgéva: ghe gèra tante, ma tante persone, che gèra in tùto e par tùto bisognóse de sostentamento, che iù sentiva (come che testimònia i storici) come so fradèi dirèti, squàsi come che i fasesse parte de na famégia unica, co tùti i problemi economici e giuridici che sta ròba qua ghe comportava.

El so pàroco gèra don Antonio Costantini (Cortina d'Ampezzo, 1821-Tombolo, 1873), che el pì dée volte el sostituiva dapartùto pàe so condissión de saiùte pitòsto precàrie.

El gèra on pàroco che lo tegnìva de òcio, e lo mesuràva ben cóea mesùra critica de el pastór che sentiva ea responsabiità de indirissàre a so vòlta àe so future responsabilità i pretìni che ghe gèra afidài: co iù el prète e capeàn novèo el discuteva e el se consultàva, vegnìndo cosìta a vére na so esperiensa pastoràe.

A Tombolo el ga scomissià a scrìvare prediche, discorsi sacri e istrussión catechistiche (tùto el materiàe dée prediche che iù ga scrìto in vari periodi déa so vita el xé sta racòlto in seguito in sìnque voiùmi, che dèso xé conservài in Biblioteca del seminario de Treviso).

Par de pì, sóto ea guida “maièutica” de don Costantini, el se ga fàto na sèrta fama de oratore forbìo: e co na pónta de ironìa el vegnìva denominà “cappellanus de cappellanis” parché, deventà sèebre in diocesi de Treviso, el gèra dimandà née varie paròchie, e pàrfìn el xé ndà a resitàre néa catedràe on panegirico sol Beato Enrico da Bolzano, uno dei patròni secondari déa sità de Treviso.

In sta so prima comunità el se dedicava tante volte àe òpare de carità, trascuràndose nel vestire e ànca née so necessità vitàe.

El gavéva na so concessión providensiàe, fataìstica e imobiìstica déa povertà e déa richéssa déa sénte: quando che el ga dìto quél sèebre discorso funebre a Sitadèa (Padova), in ocasión de l'aniversario dèl funeràe déa contessa Elisabetta Viani el 24 de novénbre del 1863, el ga pròpio dìto ciàra ea so teoria so el rapòrto che secondo iù ghe doveva èssare tra ea povertà e ea richéssa. Secondo el so modo de pensàre, pài poaréti no gèra consepìbie on riscàto néa società se no néa mesùra che i ghe doveva permétare ai sióri de ndar drénto al Regno dei Siéi.

A so giornàda gèra caraterisada da na atività a dir poco frenetica: el dormiva poco, el gèra inpegnà dapartùto, el gèra ònipresente, el sostituiva el so pàroco quando che el gavéva i atàchi déa so maeatìa.

I ghe diséva “moto perpetuo” parché el gavéva na incessànte atività drénto a so paròchia de Tombolo e ànca fòra. El gèra sénpre a dirèto contàto cóea so popoeassión de giorno, àea sera el ghe dava lessión de canto coràe e el se tegnìva a disposission par insegnare a lèsare e scrivere ai inàlfabeti, che gèra tanti e po tanti in chel tenpo.

El studiava, àea fine déa so giornàda, e òpare de San Tommaso, a Sacra Scritùra, el dirìto canònico, che a chel tenpo el gèra sóeo on missiòto de normatìve giuridiche che se gèra ingrumàe in tùti i sècoi déa Césa Catòica.

Dopo el se butàva in lèto e el dormiva sóeo par quàtro ore.

Dei so guadagni, che gèra pitòsto magróti, no el investiva gnànca na paeànca: i testimoni dei procèsi canònici i assicùra in còro che el so capeàn l'esercitava co costànsa ea carità materiàe: gèra pròpio sicuro che a Providensa lo gavaìa sénpre tegnùo su e guidà in ogni momento déa so vìta, e che iù ghe dava a tùti quéo che el gavéva, rivàndo a fare on sàco de dèbiti, che i riguardava ànca a so famégia de Riese, e che par scanceàrli tùti el ga scomissià a conóssare ea via dei Monti de Pietà di Sitadèa (Padova) e de Castelfranco Veneto (Treviso), dove che l'inpegnava el so reògio de arsénto. El vegnìva ritegnùo da tùti on santo e na perla de prete.

Per tùte ste so carateristiche umane e cristiane, el pàroco Costantini el ga profetisà: “Presto eo vedarémo pàroco de una dée pì inpórtante paròchie déa diòcesi de Treviso, e po dòpo eo vedarémo ànca co e calse rosse...e po dopo...chissà!”.

Secondo el storico mons. Angelo Marchesan, che ga scrìte una dée vìte pì complète de Sarto (vita che xé stàda àncà corèta in bòsse de stanpa de so pròpia màn dal papa in persona o dal so secretàrio), no el ga mai desmentegà el periodo de nove àni de Tombolo, cossìta inportante pàea so formassión come òmo e come prète: “Tombolo xé stà el vero tirossìnio déa carièra de Césa de don Bèpi Sarto, e el Costantini xé stà el so vero maestro, siór de dotrìna e de esperiensa”¹⁷.

Nel 1867 el xé stà invità dal so vescovo, mons. Federico Maria Zinelli (Venèssia, 1805-Treviso, 1879), a partessipàre a on concorso par assùmare ea responsabiità pastoràe de una dée sìnque paròchie che aeóra gèra restàe ìbare. El 21 de màgio del 1867 el xé stà nominà pàroco de Salsàn, in provincia de Venèssia ma in diòcesi de Treviso, a pì inportante dée paròchie messe in concorso dal vescovo.

Quando che el xé partìo da Tombolo el xé stà rinpiànto da tùti i tonboeàni.

Giuseppe Sarto prète novèo. El xè sta consacrà prète el 18 de seténbre del 1858 drénto al duomo de Castelfranco Veneto (Treviso) da mons. Giovanni Antonio Farina, vescovo de Treviso. Do mesi pì tardi el xé sta invià come capeàn a Tombolo (Padova).

Pàroco de Salsàn (màgio 1867-novénbre 1875)

El ga fato el so ingrèsso in paròchia de S. Bórtoeo de Salsàn de sàbo, sénsa gànca on festegiamento esteriore, ea sera del 13 de lùlio del 1867.

Che iù vegnìsse a Salsàn no gèra gradìo dàea sénte e da quéi che comandàva, co in tèsta quéi del Bunissìpio e ànca i fabrissièri, abituài come che i gèra a vére piovàni de gran esperiénsa, de gran fama e de gran scarsèa. E paròe de scarso apressaménto e i mugùgni no se ga fàto téndare: màssa sóvane (32 àni) par na paròchia cosìta inportante, co poche referénse, màssa poco conossùo. On pretìn, insóma, “che no se ghe darìa un schèo”, ma pì presto che de prèssa tùti i se ga ricredùo e i se ga ànca pentìo de vére mesurà col metro chi che ndàva mesurà in altro mòdo.

Salsàn gèra na paròchia de 2282 àneme, che pàea pì gran parte gèra contadini, squàsi tùti mesàdri déa famégia de Moisè Vita Jacur (1797-1877), on ebrèo che gavéva gran possesión da ste parte.

Come tùti i storici, ànca quéi che no créde, i xé d'acordo de sotoìneare l'inpégno pì grando del nòvo e sóvane pàroco xé sta quéo de farghe dotrìna sia ai adulti che ai putèi.

El ga scrìto on catechismo, sóea falsarìga de quéo che el tegnìva a diàeogo co don Giuseppe Menegazzi (Noale, 1840-Treviso, 1917), el so sucessóre come pàroco de Salsàn dal 1876 al 1885.

El frùto concreto de sta metodoeogìa nòva xé stai do quadernéti scrìti a man, scovérti e vaeórisài da mons. Francesco Tonolo nel 1954, e po dopo da mons. Giuseppe Badini nel 1974, che contìèn 577 dimànde e risposte ¹⁸.

Sto mòdo de fare col catechismo ciamava a Salsàn i fedéi dée paròchie vissìne, che i disertava e so cése e che i fasséva nàssare e agnànse dei prèti davanti al vescovo, che el se strenséva e spàe e che el ghe consiliàva: “fè ànca voiàltri cosìta!”. E insième àea dotrìna ordinaria el curava ànca ea Confraternita déa Dottrina Cristiana, inpiantàda a Salsàn fìn dal 1723.

On altro aspèto che xé conossùa in tùto el mondo la assión pastoràe de don Giuseppe Sarto come pàroco de Salsàn xé quéo déa amissión àea prima comunión dei putèi in età cosìta sóvane che no se podarìa crédarghe, parché li comunicava pròpio péna che i gèra bóni de distìnguare ea difarénsa fra el pan pensà come magnàre de ogni dì e el pàn pensà come nutrimento spirituàe: el ga antissipà ea amissión all'età di 7-8-9 anni, come che i dìxe, e invésse gèra in uso squàsi dapartùto a prima comunión sói 12-14 àni.

ànca ea liturgia e ea musica sacra gèra par el sóvane pàroco de Salsàn momenti de gràn inpégno, che i gèra intimamente igài tra de eóri: el ga restaurà l'organo de Nicoeò Moscatelli, messo su nel Sètesento, amplià da Gaetano Callido e dàea dìta Fratelli Bazzani (9 novénbre 1867), e in inverno del 1868 el ga istituìo na scuòea seràe de canto sacro e itùrgico. Cosìta el xé deventà tanto conossùo tra i estimatori che gèra drento àea musica: de sèrto el gèra de ivèo ultradiocesano, tanto che el xé stà invità a partessipàre al 1° Congresso dei cattolici italiani, che se ga tegnùo a Venèssia nel 1874 (12-16 giugno), ma no el ga vùo modo de ndàrghe ¹⁹.

Ea so atività pastoràe par quéo che riguarda el culto mariano se ga reaisà sóra de tùto néa devossión pàea Madòna del Carmine, onoràda a Salsàn sóto el nome de Madòna déa Roata. Po dopo el ga ànca istituìo ea pia pràtica del mese de màgio (1869), che prima gnànca no esisteva, e el ga onorà ea Madòna Imacoeàda ordinando na pàea de altare pàr l'oratorio déa locaità de Castelliviero. Pàr de pì el ga contribuìo a aumentare el culto de Sant'Antòni de Pàdoa, de S. Luigi e de S. Vaéntin co n'altra pàea de altare comissionàda nel 1870 al pitór venessiàn Pietro Nordio.

Dàea parte pì stretamente aministrativa, de sèrto no xé sta fàssie ea gestión del pasàgio dàea dominassión austriaca al regno de l'Italia péna ussìa dàea Tèrsa Guèra de Indipendensa, che ga trasferìo al Veneto ea legislassión giacobina e contro i preti che ghe gèra prima nel regno del Piemonte.

El se ga trovà subito a rivendicare àea so nòva paròchia el eàssito del so predecessor, don Antonio Bosa (Pagnano, 1804-Salzano, 1867), che po dopo el xé riussìo a trasformare néa Pia Opera Bosa, co un pensiero del tùto particoeàre dedicà àe tóse oneste che gavéva da maridàrse, ai sóvani e al eavóro dei sóvani.

Come tànti pàroci del Veneto de l'Otossénto, el se ga trovà investìo déa responsabiità de dirìgere e scuòe del comune de Salsàn: nel 1868 el xé sta incaricà déa diressión de scuòe comunàe e nel 1869 el xé deventà sopraintendente; quando che el gèra pàroco i ga vèrto ea sessión feminìe déa scuòea comunàe, parché prima, quando che comandava i austriaci, pàe dòne no gèra prevista gnànca na s-ciànta de istrussión. Iù mirava ànca a l'alfabetisassión déi adulti, e pàea so istrussión el se ga doparà in modo speciàe sóe ore seràe.

El se ga ànca strussià pài ansiàni e pàea publica sanità, parché el ga potensià l'ospeàe sivìe (uno dei pochi che ghe gèra in provincia de Venèssia, ciùso pàr rasón finansiàrie nel 1883, òto àni dopo che iù gèra ndà via da Salsàn) e a casa de ricòvaro pàr i vèci, che gèra stai fondài da don Antonio Bosa nel 1855, gràssie al eàssito de don Vittorio Allegri (Loreggia, Padova, 1791-Padova, 1835), pàroco de Salsàn dal 28 de aprìe del 1791 al 24 de otóbre del 1825 ²⁰, dàndoghe ànca na normativa nòva e adeguàda (statuto e regoeàmento interno).

El ga curà so on mòdo particoeàre l'unión del paese, che el gèra sta frassionà sia dal punto di vista sivìe che ànca da quéo aministrativo fin al tempo déa fine déa plurisecoeàre dominassión déa Serenissima Repùblica Veneta, división tra la sénte che e gèra ancora vive ai só ténpi.

Come a Tombolo, ànca a Salsàn el ghe dedicava poco ténpo a dormire de nòte.

El studiàva sóra de tùto i Padri déa Césa, el se esercitàva néa oratoria eclesiastica e el continuava a scrìvare e so prediche.

Tanto ùtie par ricostruire storicamente tùte e só inissiative xé on Registro di una cassa privata, che el tegnéva de fiànco a quéo uficiàe: el notava ogni minima spesa che el gavéva da fare. In sto Registro xé stàe notàe chée poche mìsare entràe de schèi, squàsi tùte rancuràe cóea borsa che el fasséva girare in césa e dàe “sérche”, cioè dàe questue in generi de natura, come el forménto, el granturco, a ùa, a égna, i gaéti novèi del ponàro, i bòssoi da séda (e gaéte), i vòvi, e el vin; el notàva ànca tùte e spese: quée pì pesante e va sercàe néa estinsión de on debito grandissimo, che gèra stà inpiantà dal so predecessór, don Antonio Bosa, che intorno al 1843 el gavéva vossùo ricostruire squàsi del tùto eà césa de Salsàn in stile neoclassico. El xè stà on debito difìssie da onorare, ma che el ga estinto “usque ad ultimum quadrantem” (che vorìa dire: fin a l'ultimo scheéto) el 12 de dissénbre 1873, quando che el ga pagà i ultimi 1000 franchi all'impresario de Miràn Giuseppe Dal Maschio (1829-1889), fiòeo de quél Marco Dal Maschio (1793-1870) che tanto se gèra doparà presso el pàroco Sarto pàr vegnìre casa de quanto che ghe gèra dovùo.

Par quanto che riguarda el lavoro dée fémene, don Giuseppe Sarto el se ga inpegnà quando che xé stada industriaisàda na atività del posto, igàda ai “cavalièri” (i bachi da seta), presente a Salsàn forse dal 1600: el 26 de seténbre 1872 el finansièr ebreo padovan Moisè Vita Jacur (1877) el ga inaugurà na fiànda (setificio) che ghe dava lavoro a sìrca 200 tosate e dòne de sto eògo. El pàroco e i fabrisièri ga contribuìo ànca àea so fabricassión, asuméndose a impresa déa fornitura déa giàra che dovéva servìrghe al bisògno, come che el ga scrìto: “néa sperànsa de podére in qualche modo, cóe prestassióni semi gratuite dei parochiàni, a provédare ài urgenti bisògni déa pòvara Césa” ²¹.

Questo va ben par la so assión nel sociàe, ma iù el xé sta sóra de tùto un prète, tùto dedicà a salvare e àneme.

Infàti, dal punto de vista reigióso, el ga portà in gran cosiderassión ea funsión dée Quarante Ore de adorassión del Santissimo néi primi tre gironi déa Setimana Santa, e el ga riorganisà ea Confraternita del Santissimo Sacramento nel 1875, pròpio ne l'àno che el xé stà promòsso canonico del Capìtoeo de Treviso. On altro obietìvo che el gavéva intensión de reaisàre in che l'àno xé sta quéo de fondare l'associassión dée “Figlie di Maria”, ma questo xé stà portà vànti dai so sucessóri.

El ga esercità ea carità spirituàe e materiàe al massimo grado, e el se ga afidà àea Providénsa: in sto campo qua el ga continuà a perfessionare, ànca a Salsàn, el comportamento de tùti i giorni che el gavéva sà anpiamente coeaudà a Tombolo, parché là el donava a so biancheria personale, el magnàre che so sorèe ghe cusinava, e égne, el gràn, e ànca e so scarpe.

Co no ghe bastava i schèi, a Salsàn tante volte el ga inpegnà al Monte de Pietà de Venèssia el so anèo parochiàe, donà ai pàroci de Salsàn da don Vittorio Allegri (1761-1835) nel so testamento del 10 de màrso 1828.

El gavéva on caràtere generoso ma inpulsìvo, che el riussìva a controeàre coéa so gràn voeontà e carità. Nel 1869 ghe ga tocà ndàre in giudìssio, ma dopo on procèsso el xé vegnùo fòra assolto, e al si posto xé stai condanài alcuni dei so parochiàni che gèra córsi in so aiuto. A storia xé ndàda cosìta: sèrti personàgi dal Dòeo e da S. Brusón, xé vegùi a divérbio col pàroco de Salsàn al dòpo mesodì déa doménega 27 de giugno 1869, e po dòpo i o ga denunsià a l'autorità parché i diséva che i gèra stài agredìi dal prète e dai so parochiàni, e i gavéva tùta l'intensión di coinvòlgiarlo in sto fàto incressióso: ma el ghe xé vegnùo fòra a testa alta, e el ga conservà tùta a so gratitudine par quéi che gavéva ciapà e so difese e che i gèra stai condanài dopo el procèsso (avegnùo el 23 e el 24 de dissénbre del 1869), co pene confermàe in apèo el 25 de genàro del 1870 ²².

Ma ghe xé ànca altri episodi inportanti, che xé stai citài dai testimoni tante volte, quando che i testimoniava e so virtù nei procèssi canonici de glorificassión de don Giuseppe Sarto: i pì interessànti i riguarda ea epidemìa del coèra, che nel 1873 gavéva investìo tùto el paese, el comune e a paròchia de Salsàn (come che el gavéva sà fàto nel 1836, nel 1847 e ancora na vòlta nel 1855). El pàroco, in quéa trista ocasión, el se ga inpegnà in prima persona, squàsi co disprèsso déa so vita. Xé restà ànca tràce significative déa so partecipassión al dràma che gavéva coinvolto i so parochiàni, e e se trova soi registri parochiài dei morti. El momento de pì alto coinvolgimento el salta fòra dàea letùra déi àti de morte de dó sóvani sposéti, Vittorio Gambaro e Bottacin Giuditta, che i gavéva rispetivamente 21 e 20 àni. El Gambaro xé morto de coèra, e ea so morte xé stàda registràda sói àti parochiài. Poche ore dopo però xé morta ànca la so sóvane muièr. Cosìta el pàroco ga consegnà ai posteri quéo che xé acadùo, co on messàgio pièn de fede e de sperànsa: “Pòra spósa. Assistendo sénsa rispàrmiarse al lèto de so marìo Gambaro Vittorio a ga ciapà el contàgio che in 5 ore sóeo la ga fàta ricongiùngiare col so sposo. E cosìta quéi che amore ga tegnùo unìi in vita ànca in morte no xè stài divisi. Che e so àneme benedéte gàbia el ripòso perpetuo”.

Stàndo al so scrìto letaràe, sarìa: “Povera sposa. Assistendo indefessa al letto del marito Gambaro Vittorio contrasse il morbo che in sole 5 ore la fé raggiungere lo sposo. E così quei che l'amore fé uniti in vita et in morte non sunt divisi. Sit perpetua animabus benedictis requies”.

Ma tùto sto no sparagnàrse ghe ga comportà on afadigaménto de gran proporsión, tanto che i se gavéva tùti preocupài par ea so saiùte, ma el xé riussìo a suparàre ànca sta diffìsie prova.

El ga lassà ufisialmente Salsàn el 16 de seténbre del 1875, ànca se i ultimi àti de passàgio dée consegne xé stai firmài el 26 de novénbre del 1875, come che risulta dai registri parochiài.

A césa arsipretàe de Salzano (Venèssia), dove che el xé sta pàroco dal 1867 al 1875. El xé sta l'unico papa che xé ndà su par tùti i scaìni déa carièra dei prèti.

Canònico a Treviso (novénbre 1875 - novénbre 1884)

El gavéva squàsi quaranta àni e mèso quando che el xé ndà a Treviso e el se ga sentà sól so stàeo canonicàe, ea prima doménega de Avénto, el 28 de novénbre del 1875.

Ciamà dal vescovo Federico Maria Zinelli (1805-79), el ga divìso ea so atività fra ea catedràe, ea Curia e el seminario, ma no ghe xé mancà gnànca el ténpo de impegnarsi col Movimento Catòico Trevisàn, che el gèra drìo mòvare i so primi passi: 17 àni pì tardi, dal 1892 in vànti, el gavarìa dà on gràn inpùlso àe Casse Rurali Catòiche; e in campo giornalistico, coeaboràndo co i periodici L'Eco del Sile (1878-82) e Il Sile (1883-1885), che i sarìa sfociài ne La Vita del Popolo, el giornàe diocesàn fondà nel 1892.

A Treviso el xé sta prinsipàlmente cancelièr vescovìe, diretór spirituàe del seminàrio e canònico residensiàe del Capìtoeo: però el Marchesan ga evidensià in de pì ànca ea so presénsa come consilièr nel Tribunàe Eclesiàstico e come esaminadór prosinodàe.

In sti 9 àni che xé durà el periodo trevisàn, el ga vùo modo de adentràrse sénpre de pì e mèio nei meandri del dirìto canonico e de conóssare bén i problemi del seminario.

Come sacro oratór el ga continuà a èssare rissercà, come catechista el ga fàto tesoro dée esperiénse de Tombolo e de Salsàn (el ga portà sénpre drìo de iù i dò quadernéti che el ga scrìto a Salsàn) e, par quanto che riguarda el ànbito liturgico, el ga continuà a tegnérse agiornà, specialmente in quéo che gèra el so tema preferìo: ea musica sacra (nel 1882 el ga partessipà ad Arezzo àe feste del centenario del monaco aretino).

Sircondà sénpre, ànca se l'età gèra reativamente sóvane, dàea stima dei so confradèi canònici, come riconossimento del so valore de governo, el xé sta elèto primissério del Capìtoeo dei canonici el 12 de giugno 1879 e, àea morte del vescovo Zinelli, a 44 anni sóeo, el xé deventà Vicario Capitolare: el gèra responsàbie cosìta dée 210 paròchie e déi sìrca 350.000 fedéi déa diocesi fra il 27 de novembre 1879 e el 26 de giugno 1880.

In squàsi nove anni de servìssio àea Césa de Treviso el ga servìo tre vescovi: Federico Maria Zinelli fra el 1875 e el 1879, Giuseppe Callegari dal 1880 al 1883, e Giuseppe Apollonio fra el 1883 e el 1884. Nel seténbre 1884 ghe xé rivà eà notìssia de éssare sta nominà vescovo de Mantova, e el 16 de novénbre 1884 el xé sta consacrà vescovo a Roma, néa césa de S. Apollinare, dal cardinàe mantovan mons. Lucido Maria Parocchi (Mantova, 1833-Roma, 1901), vicario de Leone XIII par la sità de Roma.

Mons. Giuseppe Sarto quando che el gèra pàre spirituàe del seminario, cancelière vescovìe e canonico a Treviso, so na fotografìa de l'àno scoeastico 1875-76, insième col vescovo mons. Zinelli, àe spàe de mons. Pietro Jacuzzi, capeàn de Riese che lo ga invia a deventare prete, che in quéa epoca gèra professór e retór del seminario de Treviso.

Vescovo de Mantova (novénbre 1884-giugno 1893)

Sìnque mesi pì tardi, el 18 de aprìe 1885, el ga fàto el so ingrèso néa diocesi de Mantova: na diocesi “difìssie”, che Gianpaolo Romanato ga definìo “na diocesi àea derìva” ²³.

Come vescovi àea guida de sta diocesi i gavéva sà faìto do vescovi intransigenti: mons. Pietro Rota (S. Prospero, Reggio Emilia, 1805-Roma,1890) fra el 1871 e el 1879, e mons. Giovanni Maria Berengo (Venèssia, 1820-Udine, 1896) fra el 1879 e el 1884. El primo ga rinunsià a l'episcopato de Mantova e el secondo xé sta “promosso” àea sede vescovìe de Udine .

L'ambiente sitadìn gèra caraterisà da na difùsa miscredénsa, da setarìsmo e da anticlericaìsmo “rabióso” fomentài da na atìva presénsa déa Masonerìa. ànca i ambienti colti déa cità gèra inpenìi de idee ispiràe a sientìsmo, a rassionaìsmo e a positivismo.

El capofìa del positivismo italiàn, Roberto Ardigò (1828-1920), professór del seminario mantovàn e canonico, el gavéva butà a tònega àe ortìghe nel 1871. El xé el caso pì cèebre e emblematico, ma sà l'àno prima 10 prèti gavéva messo in nafataìna el so àbito clericàe.

El nòvo vescovo se ga subito inpegnà par “ricostruire” el seminario, che gèra sta sarà ciùso par qualche àno fra el 1870 e el 1880, e sà nel 1886 ea “cura Sarto” registrava i primi frùti.

N'altro obietìvo che el gavéva focaisà imediatamente gèra ea “ricostrussión” dée comunità parochiàe del posto, sopratùto dal punto de vista eclesiàe, secondo e ìnee pastoràe sà reaisàe e sà coeaudàe nel Veneto, insentràe so na atìva vita sacramentàe e so l'insegnamento déa dotrìna cristiana. Sta ricostrussión dal punto de vista reigióso a doveva vére dei riflèssi ànca so na ricostrussión che gavéva da avenìre contemporaneamente néa vita sivìe déa società mantovana, travaliàda no poco dal movimento de ispirassión anarchico-sociaìsta “La boje”: el nòvo vescovo voéva simentàrse in on tentativo de rifondare na Societas Christiana traverso ea rivitaìsassión dée atività che, pì o mànco in modo vérto, e presentava na ispirassión evangèica.

El 18 de agosto 1885 el nòvo vescovo ga indìo ea Visita Pastoràe déa diocesi (na seconda Visita Pastoràe xé sta scomissàda el 25 de màgio del 1889). Tànti e vari xé i campi che a so assión reigiósa e riformista se ga fàto sentire.

Sóra de tùto ghe xé el campo déa catechesi e déa dotrìna cristiana: sà el 12 de otóbre del 1885 el ga vossùo che in ogni paròchia fùsse istituìa ea Scuòea déa Dotrìna Cristiana, e che in tùte e doméneghe e née feste di precèto se gavarìa dovùo spiegare el catechismo al pòpoeo e ai putèi.

Qualche volta el tegnéva iù stésso in persona a catechesi al posto de on pàroco che fùsse par qualche rasón inpedìo, o in paròchie che no gavéva on préte, e el sorveliàva aténtamente par rendarse conto de persona se e come vegnìva inpartìo l'insegnamento dotrìna cristiana née paròchie déa so diocesi.

N'altro campo che ga registrà el so intervento riformistico atìvo e intransigente xé sta quélo déa musica sacra, parché a musica de césa, a Mantova come nel Veneto, a géra de stìe teatràe e meodramàtico. El 15 de otóbre del 1887 el ga icensià tùti i cantori del duomo de Mantova e el ga istituìo ea scuòea dei cantori seminaristi.

Quando che gèra par fenìre el so mandato episcopàe a Mantova, el ga incontrà el maestro Lorenzo Perosi (1872-1956), aeóra sovanissimo, che el ghe ga parlà déa musica sacra che se fasséva néa sèebre abassìa de Solesmes, el centro benedetìn francese che gèra el pì conossùo al mondo par e so rissérche de rinovamento itùrgico e de sviùpo del canto gregoriàn. Come vescovo, el ga sénpre racomandà sto tipo de canto, tentando de fare in mòdo che el deventàsse popoeàre parché el fùsse cantà in césa durante e ceebrassión itùrgiche.

No xè sta scrìto mai massa a sto proposito. Ma èco el so pensiero a sto riguardo: “L'argomento da racomandare xé el Canto Gregoriàn e specialmente el modo de cantarlo e de réndarlo popoeàre. Oh! se se podésse otégnare che tùti i fedéi, come che i canta e Tànie Lauretane e el Tantum Ergo, cosìta i cantasse e parte fisse déa Messa: el Kyrie, el Gloria, el Credo, el Sanctus, e l'Agnus Dei. Questa sarìa par mi a pì bèa dée conquiste déa Musica Sacra, parché i fedéi, fasséndo parte de quéi che partèssipa veramente àea Sacra Iturgìa, i conservarìa mèjo a pietà e a devossión”.

El stésso concèto el ga ribadìo qualche àno pì tardi. “Mi me e imàgino”, el ghe scriveva a mons. Giuseppe Callegari quando che el gèra patriàrca a Venèssia, quando che el gavéva ormai maturà a sto riguardo na strategia pì miràda e pì profonda: “mìe e mìe vóse che e canta so na césa de canpàgna la messa dei àngei [...] e mi resto rapìo, come che me ècita sénpre àea pietà e àea devossión i canti del pòpoeo nel Tantum Ergo, nel Te Deum e née Tànie e mi e preferìsso àe musiche póifoniche che no e sia ben dirète” ²⁴.

Sà a Mantova el gavéva messo in guardia contro chel movimento de pensiero che, vìnti àni pì tardi, el sarà ciamà “Modernismo”: el 7 de febràro del 1887 el ga puntà el déo contro tùti quéi che “siben che i conóssa i modo superficiàe a siénsa déa reigión e manco ancora i a pratica, i pretende de deventàre i maestri e i va diséndo [...] dopo de vére desmentegà a antica follìa déa Croce, [che] i dogmi déa nostra fede i gàbia da adatàrse àe esigense déa nòva fiosofia”. Uno de quéi fiòsofi che ndàva de moda gèra el gesuita inglese George Tyrrell (1861-1909), e n'àltro gèra l'esegeta e storico dée reigión francese Alfred Loisy (1857-1940). Sto movimento ga trovà séguito in Italia e seguaci de on sèrto rilièvo. El xé però on fenòmeno che xé da indagare co inparsiaità pì grànda, dàda a deicatéssa déa materia, ma el xé sta inportante parché el ga ciamà l'atensión de tànte e notévoi personaità. tra i àltri, ghe gèra i prèti Romolo Murri (1870-1944) e Ernesto Buonaiuti (1881-1946), el romansièr Antonio Fogazzaro (Vicenza,1842-1911), el barnabita ligure Giovanni Semeria (Coldiroli, 1867-Sparanise, 1931), e po ànca Giovanni Genocchi (Ravenna, 1860-Roma, 1926), el magistrato romàn Adolfo Lepri (1881-1948), Mario Augusto Martini (1885-1962) e Guido Manzelli (1888-1960).

El spirito de riforma déa diocesi che o spenséva o ga ispirà a convocare on sinodo diocesàn, che in diocesi de Mantova no se tegnéva da sìrca do sècoi: indìo el 16 de febràro del 1887, el xé sta seébrà dal 10 al 12 de seténbre del 1888, e cosìta la diocesi mantovana se ga dà quéa Magna Charta che agiornava a so vita reigiosa e ghe cavàva via tùto quanto quéo che se gèra vegnùo acumueàndo in modo disordinà dal Setessénto al 1887, sénsa che nìssun prèsue déa Diocesi de Mantova fasésse e sièlte pastoràe che ghe gèra de bisògno.

El ghe ga dà spàssio a l'Assión Catòica e el ga vùo na parte notévoe néa costitussión déa Unión Catòica Italiana de Studi Sociài, nata a Padova el 29 de dissénbre del 1889 par òpara de mons. Giuseppe Callegari, del trevisàn Giuseppe Toniolo (Treviso, 1845-Pisa, 1918) e del bergamasco Stanislao Medolago Albani (Bergamo, 1851-1921).

El ga sénpre invità i so pàroci de fàrse promotori infadigàbii déa comunión frequente e quotidiana, co particoeàre riguardo àea amissión dei putèi àea mensa eucaristica.

El ga ànca vùo quéa particoeàre sensibiità par i problemi de l'emigrassión, che néi àni Otanta de l'Otossénto el disanguàva e campagne taliàne: el ga sercà de frenàre quéa ondàda migratoria verso i paesi transoceanici, sóra de tùto el Brasìe, e indóve che no el riussìva, el fasséva in modo che le paròchie fùsse pì vissìne ai so parochiàni eontàni.

ànca a Mantova, come quando che el vivéva nel Veneto, el ga vùo na vita semplice ogni giorno: el se conportàva come on semplice prète e in vescovado el se ga circondà, come a Salsàn, dée sorèe che gèra restàe da sposare par far fronte ae fassénde de casa. El gèra sénpre vissìn ai poaréti co l'aiuto materiàe e co a man vèrta, ma ànca l'acoliéva sénpre tùti, sénsa distinssión de scaìn sociàe e de schèi.

I squàsi nove àni passài a Mantova i presenta on biàncio anpiaménte positivo: a diocesi in nòve àni xé stàda ricostruìa e fondàda in mòdo sicuro e saldo so basi rinovàe.

L'assión pastoràe de Sarto, che se ghe vardàva co amirassión cressénte, sussitàva ogni giorno de pì consensi e onori: sóra el vescovo Sarto infàti “vigiàva” sénpre da Roma el sòito osservatór d'ecessión, el vicario de Leone XIII, el cardinàe mantovàn Lucido Maria Parocchi (Mantova, 1833-Roma, 1901), pròpio quéo che o gavéva consacrà vescovo. Questo lo ga definìo “el mèjo vescovo déa Lombardia”. Sarto eóra xé sta propòsto par ea pórpora cardinaìssia. Ma iù el se ga rifiutà. Però el Segretario de Stato, Mariano Rampolla del Tindaro (Polizzi Generosa, Palermo, 17 agosto 1843 - Roma, 16 dicembre 1913) ghe ga fàto capire che restare déa so idea forse gavarìa dà on dispiassére gràndo al papa.

E aeóra el ga finìo co l'acetàre.

Sto onore ghe gavéva spetà pà i meriti acuisìi sol cànpo a Mantova, e no parché el gèra sta promòsso patriarca de Venèssia, sede che gèra tradissiónalmente cardinaìssia. El xé on pónto, questo qua, che va ben ciarìo: no el xé sta fàto cardinàe parché el ndàva Venèssia, ma el xé sta prìma cardinàe de Mantova, ànca se pàr pochi dì. El xé sta partànto elèto cardinàe de Mantova, col tìtoeo de S. Bernardo àe Terme, nel concistoro secrèto del 12 de giugno del 1893: tre dì dopo, el 15 de giugno, el xé sta promòsso al patriarcato de Venèssia. Sta sede vescovìe e cardinaìssia géra restàda ìbara pàr on àno e mèso dopo che gèra morto el card. Domenico Agostini, patriarca de sta sità dal 1877 al 1891; a causa gèra stàda el rifiuto de tanti vescovi, xé véro, ma gavéva da passàre ancora 15 mesi prima che iù podésse tòre possèsso de S. Marco: el così déto regio Exequatur no rivàva mai, a causa de l'oposissión de Francesco Crispi, che el ghe oponeva el dirìto déa nomina regia par el patriarcato de Venèssia.

Sóeo el 5 de seténbre 1894 el re ga finalmente firmà sto benedéto decrèto, e el 24 de novénbre del 1894 el Sarto podéva cosìta insediarse sóa càtedra de S. Lorenzo Giustiniani, el protopatriarca de Venèssia. I venessiàni i o ga acòlto co gran feste: forse mancava sóeo i aministratori déa sità eagunàre, de tendensa liberal-democratica, che i ga tegnùo ben ciùso par l'ocasión el munissìpio.

Mons. Giuseppe Sarto vescovo de Mantova (1884-1893).

Cardinàe patriarca de Venèssia (1893-1903)

Sìrca on àno dopo el so ingrèsso, nel 1895, a Venèssia se ga tegnùo e elessión comunàe, che ga dà vita àea Giunta Grimani (e pàea so afermassión eletoràe no xé stàda par gnìnte estranea l'òpara del nòvo patriarca), destinàda a governare a sità par 25 àni, fin al dissénbre del 1919: ea gèra espressión de on ragrupamento de catòici e de moderati, guidài dal conte Filippo Grimani, e a ga costituìo na anticipassión de quéa stagión del catoicèsimo italiàn che, nel periodo de Giolitti, el ga portà a l'atenuassión progresìva del non expedit de Pio IX e al Patto Gentiloni (1913).

Dal punto dei vista pastoràe, el periodo venessiàn se còeoca a mèsa strada fra el magistero episcopàe mantovàn e el magistero universàe del periodo del papato: in sto ténpo xé vegnùi riciapài, anpliài e aprofondìi tùti i temi pastorài sà méssi in mòto a Salsàn come pàroco e a Mantova come vescovo, e che dopo i sarà portài in dòta e “patrimonio” a tùta ea Césa universàe.

A istrussión catechistica e a predicassión a Venèssia gèra màe organisàe e co finaità che no gèra del tùto ben precisàe.

A sacra eloquénsa gèra tribunìssia e ànca trombóna, retòrica, e disarìa squàsi profana. Xé sta cosìta che el nòvo patriarca, come primo àto del periodo de govèrno eclesiàstico venessiàn, no el podéva no intervegnìre a sto riguàrdo: co on documento datà 17 de genàro del 1895, el ghe ga ordinà àea scuòea de catechismo e de formassión dei catechisti de dàrse e man da tórno, e no sóeo par l'atività nei patronati, ma ànca pàe scuòe del comùne. Come che el fasséva a Mantova, tante vòlte el fasséva qualche blitz par indagare se e come e so diretìve e vegnìva aplicàe, spèce se se tratàva de “spirito de pietà, de ardore de carità, siénsa e seria preparassión”.

Par el seminario e el clero el ga vossùo na organisassión dissiplinàre e sientìfica adeguada ai ténpi, el ga rinovà el coègio dei professori, el ga riformà el corso dei studi, el ga fondà nel 1902 a facoltà de dirìto canonico (a so atività xé duràda fin al 1932) par dare ai so preti na conossénsa almànco suficénte dei problemi giuridici. El voéva ànca che i partecipasse ogni àno, insième co iù, a on corso de esercissi spirituài, e che i intervegnìsse ae conferénse de esegesi biblica, de storia e de archeoeógia cristiana.

Néa so atività de ogni giorno el curava i rapórti umani de preferénsa co i poaréti, el gèra on confessór instancàbie, vèrto àea conversión de quéi che gèra eontàni, el gèra on catechista par tùte e stagión dea vita, sóra de tùto pài sóveni e pài putèi.

Co a létara pastoràe del 1° de màgio del 1895 el ga ribadìò in mòdo autorévoe che el canto e a musica gavéva da vére a suprema finaità de èssare na “preghiera liturgica”. E carateristiche principàe gavéva da èssare informàe àea santità del canto, àea bontà de l'arte, àea universaità profonda déa preghiera, contro e “manière teatràe”. El ga cossìta indicà nel canto gregoriano, néa polifonìa secondo e règoe de Palestrina, e néa preghiera cantàda dal pòpoeo e vie maestre déa riforma déa musica sacra da cantàre in ogni césa.

El 21 de màgio el ga vossùo che vegnìsse fàta na Visita Pastoràe (che ga durà fin al 1898) e el ga ciapà ancora na volta posissión contro el “Cristianesimo moderno”, che in sèguito el sarìa sta ciamà “Modernismo”.

On fàto del tùto nòvo (e tùto venessiàn come progèto) xé sta el XIX Congresso Eucaristico, che in ordine gèra el quinto nassionàe italiàn ²⁵, che ga visto in iù, el metropoìta dei veneti, el “principàe promotór”.

L'ocasión xé stàda scomissià da na profanassión avegnùa néa césa déi Scàlsi, vissìn àea stassión dei treni. El 6 de aprìe del 1895 na man sacrìega ga robà na pisside spranpagnàndo e perdendo tùte e particole pàe càe de Venèssia. “Par fare àto de riparassión a Gesù sacramentà, e par el mondo che o misconósse”, el patriarca ga sùbito indìo on Congresso Eucaristico, che xé sta seebrà do àni dopo, tra l'8 e el 12 de agosto del 1897.

El se ga prodigà par aumentare in tùti i fedéi l'amore par Gesù ne l'eucarestia, par far créssare nel pòpoeo el desiderio de fare a comunión frequente e quotidiana; el ga esortà i pàroci a tòre àea comunión i putèi, sensa preocupàrse massa de l'età, a pàto che i fùsse bastànsa cossiénti del passo che i gèra drìo fare.

In quel stésso àno, el 1° de novénbre del 1897, el ga indìo el XXIX sinodo déa Césa venessiàna, che xé sta seebrà da l'8 al 10 de agosto del 1898: el scopo gèra quéo de réndarla pì aderente àe esigense dei ténpi nòvi, dato che a preesistente normativa risaìva al 1865, àno che a xé sta promulgàda dal card. Giuseppe Trevisanato, patriarca de Venèssia dal 1862 al 1877.

A riguardo del Movimento Catòico, sóa ìnea de quanto che gavéva afermà i Congressi de Lodi (1890) e de Vicensa (1891), el voéva che i catòici impegnài nel sociàe i fùsse ben motivài quando che i agìva coi òci de tùti pontài sóra de eóri: i gavéva da conportàrse sénpre da fradèi, co dissiplìna, obediénsa, abnegassión nei confronti dei pastori déa Césa ²⁶.

El ga tegnùo sénpre on conportaménto super partes, sercando se possibìe sénpre de portàre na mediassión tra e varie posissión e invitando sénpre quéi che sostegnéva in mòdo intransigente l'Opera dei Congressi e quéi déa corénte murriana, dìta ànca democratico-cristiana, a conportàrse ne l'inpégno poìtico co aderénsa al mesàgio déa fraternità cristiana e al magistero déa Césa, ànca se el gèra pì vissìn ai primi, sia come forma mentis, che come formassión sacerdotàe.

A Questión sociàe lo ga visto invitare tùte e persone a vardàre a Cristo-operaio, e a prodigàrse par trovare, in ogni ocasión de contrasto, na intesa fra i prestatori de òpara e i datori de eavóro. Pì che par e grande idee o teorisassión (come che gavéva fàto Leone XIII co a Rerum novarum, tanto par inténdarse), el gèra taià par i interventi pratici, ben studiài e “mirài”, che i podéva tegnìre a distànsa e idee sociaìste: el ghe ga da cosìta inpulso àea scuòea del merléto de Buràn (che ghe dava eavóro a 400 tosàte), dàndoghe on contribùto àea emancipassión déa dòna (par quéo che se pòe ciamàre cosìta nei so ténpi), e el se ga ànca premurà contro l'usura, gràssie àea costitussión dée casse operaie parocchiàe, e casse ruràe e el Banco de S. Marco, el ga insentivà e socetà de Mutuo Socórso (assicurassión contro e maeatìe), el ga incoragià el segretariato del pòpoeo par l'assistensa ai operai e ai emigrài.

Al secondo Congresso de l'Union Catòica déi studiosi de Siénse Sociài de Padova (26-28 de agosto 1896) el ghe fa fàto ai intervegnùi on discorso che gèra esclusivamente pastoràe e reigioso, scomissià e fenìo co on soène Sia lodato Gesù Cristo, che esprimeva ben a so visión del problema sociàe, impernià sóa sertessa “déa ortodossia dée dotrìne che sarà sviupàe co i criteri pì rigorosi déa siénsa cristiana, néa pì s-cèta adesión àea fede catòica e néa pì perfèta dipendénsa dàea Césa, drénto déa quàe se continua e se svolge a vita e a dotrìna de Gesù Cristo” ²⁷.

ànca da patriarca, a riguardo déa carità materiàe personàe, el gèra sénpre el sòito Giuseppe Sarto: no el se imitàva a darghe co giusta misura, ma el continuava a privarse de tùto co “prodigaità”.

E ànca se qualche storico el sotoìnea a provinciaità e a ristretéssa mentàe dée so atività pastoràe, el prèsue venèssian el gèra tànto in considerassión ànca a Roma: no el gèra de sèrto uno che se podarìa definire on sconossùo, parché el gèra considerà a “gèma del sacro Coègio” dei cardinài, e el papa Leone XIII gavéva pì vòlte esprèsso el desiderio de vérlo a Roma come so cardinàe vicario.

Mons. Giuseppe Sarto cardinàe patriarca de Venèssia (1893-1903).

Papa Pio X (4 agosto 1903-20 agosto 1914)

Morto Leone XIII el 20 de lùlio del 1903, el card. Sarto xé partìo par Roma el 26 de lùlio co on biliéto de andàta e ritórno col treno. Ai venèssiani, che gèra corsi tùti àea stassión par saiudàrlo, el ghe ga assicurà: “o vivo o morto tornarò!”.

I cardinài papàbii i gèra el cardinàe Mariano Rampolla del Tindaro, Segretario de Stato de Leone XIII, e el cardinàe Gotti: ma i ténpi i gèra oramai maùri par na sièlta del tùto nòva.

Al cardinàe Rampolla se pòe aplicare na eoquénte e càustica considerassión, riportàda da Ernesto Vercesi, che sarìa stada dìta da Leone XIII in persona: al papa i ghe gavéva domandà come mai el “Cardinàe Consalvi no gavéva vùo voti àea morte de Pio VII, dopo tùti quéi gran servìssi che iù ghe gavéva da àea Césa?”. E Leone XIII gavarìa risposto: “Consalvi gavéva durà ànca massa”. E i gèra tanti ànca drénto al Sacro Coègio che i desiderava on indirìsso tùto nòvo. Se invocava oramài da tùte e pàrte on papa che el permetésse na evoiussión che se sentiva in aria ²⁸.

El card. Sarto xé entrà in conclave dopo mesodì del 31 de lùlio 1903 e, dopo che e prime votassión gavéva evidensià na radicàe contraposissión de schieramenti, el xé sta sotoposto a pressión sénpre pì cressénti; dopo aver inutilmente sercà de no farse elègiare, in tarda matìna del 4 de agosto 1903 el xé sta elèto papa co 50 voti su 62 teoricamente posìbii (80,6%). El ga vossùo assùmare el nome de Pio, in ricordo de tùti i papi de sto nome che “nel sècoeo passà i gavéva lotà coragiosamente contro e séte e i eróri”, cioè Pio VI, Pio VII e Pio IX.

Squàsi sùbito el ga anuncià el progràma del so pontificato co l'enciclica E supremi apostolatus cathedra (4 de otóbre 1903), che a xé quéa che contièn el mòto Instaurare omnia in Christo ²⁹.

A reaisassión de un tàe progràma ga vùo on inìssio co on ritmo incalsànte, co caraterìstiche che fa pròpio da maravégia par on fiòeo del Veneto pì profóndo e pì contadìn: da el motu proprio Tra le sollecitudini (22 de novénbre del 1903) sóea riforma déa musica sacra, al motu proprio Fin dalla prima (18 de dissénbre del 1903) pàr el riódino de l'Assión Popoeàre Cristiana, e àea costitussión Commissum nobis (20 de genàio del 1904), che condanàva el Veto in Conclave, che sarìa quél anacronistico dirìto dée poténse europee de opónarse àea elessión a papa de on cardinàe par gnìnte gradìo: el xé sta usà par l'ultima volta néa storia déa Césa e del mondo dal vescovo de Cracovia, el card. Puzyna de Kozieslko, pròpio nel conclave che xé sta elèto papa Pio X.

Sùbito dòpo ghe ga fàto sèguito l'enciclica Ad diem illum (2 de febràro del 1904), par el sinquantèsimo aniversario déa definissión del dogma de l'Imacoeàta Concessión, a létara Quum arcano (11 de febràro del 1904), e co questa el ga vossùo indìre a visita apostòica àea sità de Roma ³⁰, che xé stàda seguìa in poco ténpo dal decreto Constat apud omnes (7 marso 1904), e co questo el ga ciapà na inissiatìva conpàgna par ea visita apostòica àe diocese italiane.

Sìnque giorni dopo xé sta a volta de l'enciclica Iucunda sane (12 de màrso del 1904), in ocasión del XIII Sentenàrio de S. Gregorio Magno e, 12 giorni pì tardi, xè sta el moménto del motu proprio Arduum sane munus (19 de màrso del 1904) par na nòva conpiassión de on nòvo Codice de Dirìto Canonico: iù no el vedarà ultimada sta grandissima inprésa, che vegnarà presentàda àea Césa Universàe dal so sucessóre, Benedetto XV, el 25 de màgio del 1917, el giorno de Pentecoste.

Sól frónte poìtico italiàn, el nòvo papa ga sùbito scomissià co gran cautèa e circospessión a atenuàre el Non expedit e a vèrsarse ae corénte poìtiche moderàe par evitare a elessión de esponenti radicài o sociaìsti. Davanti àea crisi de l'Opera dei Congressi, el ga ciapà a decisión de tòrla de mèso. Secondo on so disegno strategico, inprontà sóra l'assión del laicato catòico sóto on rigido e fèreo contròeo eclesiastico, co a létara La lettera circolare (1 de màrso del 1905) el ga riprovà a Democrassìa Cristiana Autonoma, e con l'enciclica Il fermo proposito (11 de giugno del 1905) el ga favorìo a riorganisassión de l'Assión Catòica in Italia.

Pròpio convìnto de l'inportànsa del laicato catòico par ea riconquista cristiana déa società, el vedeva néa so assión on proiungamento de l'assión de ogni giorno del clero in cura de àneme, in na visión del tùto confessionàe del mondo e déa società, néa quàe vegnéva fòra a pragmaticità pastoràe del vècio pàroco de Salsàn.

El 1905 xé sta ànca l'àno de l'enciclica Acerbo nimis (15 de aprìe del 1905) sóra l'insegnamento del catechismo e déa dotrìna cristiana, pròpio uno dei primi interventi in sto campo, par sti insegnamenti qua el sarà ciamà el “papa del catechismo”. Ma, a fianco de sto tìtoeo, se trova ànca quéo de “papa de l'eucaristia”, parché a comunión xè sta el tema fondamentàe del decreto Sacra Tridentina Synodus (20 de dissénbre del 1905), che ga riguardà a comunión frequente e quotidiana.

El se ga ànca inpegnà sol fronte déa poìtica internassionàe, parché gèra intanto scopiàda a questión francese: dopo tùte e questión igàe àe “leggi inique” votàe in Francia contro a Césa fra el 1880 e el 1903, e e controversie che gavéva seguìo a visita al Quirinàe del presidente francese émile Loubet (1838-1929), avegnùa nel 1904, el 9 de dissénbre del 1905 el parlamento francese ga votà a lège de separassión fra Stato e Césa. A risposta de Pio X no se ga fàto aténdare, e a se ga concretisàda in do encicliche contro el governo francese: ne l'enciclica Vehementer el ga condanà a separassión fra Stato e Césa in Francia (11 de febràro del 1906), e in quéa Gravissimo officii munere el ga condanà e lège del culto che el governo francese gavéva proposto (10 de agosto del 1906).

Quésti do qua no xé stài i unici àti igài a controversie fra Césa e Stato. ànca in altre nassión, come in Ecuador e, qualche àno dopo, in Portogàeo, el Stato gavéva emanà “lège persecutrici” in confronto déa Césa: Pio X ga esprèsso el “so doeóre” co a létara Acre nefariumque bellum (14 de màgio del 1905) contro e lège votàe in Ecuador e, sìe àni dopo, co l'enciclica Jamdudum in Lusitania, par quée votàe in Portogàeo (24 de màgio del 1911).

A coronamento de na òpara cosìta eficàce e aténta, duràda almànco 30 àni, no xé mancà on progèto de riforma dei seminari de l'Italia, reaisà co on provedimento autorévoe el 16 de genàro del 1906.

in quel stesso àno ghe xé stai do interventi de magistèro, uno sóra el clero e uno sóra el sacramento de l'eucaristia, che sarìa l'enciclica Pieni l'animo sóra l'educassión del clero sóvane (28 de lùlio del 1906) e el decreto Post editum sóra a comunión ai maeài che no gèra a digiuno (7 de dissénbre del 1906).

Dopo vére ancora na volta manifestà a posissión déa Santa Sede davanti al governo francese, co l'enciclica Une fois encore (6 de genàro del 1907), Pio X ga condanà 65 proposissión moderniste co el decreto Lamentabili sane exitu (3 luglio 1907) e tùto el movimento modernista co l'enciclica Pascendi dominici gregis (8 de seténbre del 1907), etichetàndoeo come a “sintesi de tùte e eresie” e verséndo na stagióne déa Storia déa Césa contemporanea che no xé stàda gnancóra capìa fin in fondo.

El 1907 xé sta l'àno che ga culminà in modo vioénto e viruénto sta lòta: par sti fatti che xé sucèssi ànca in sèguito ghe ga vossùo on supleménto de indagine pròpio nel momento déa beatificassión, par rispóndare a tùta na sèrie de sospèti e de “veéni” che gèra stai mandài in giro sóra quéo che el papa gavéva fato e sóra e efetìve responsabiità del papa ³¹, che gèra intervegnùo co estremo vigore, sénpre co on pugno de fèro drénto on guanto de veùdo, dato che a so formassión intransigente no ghe permetéva altri modi de conportaménto, e i ténpi che el ga vissùo no ghe permetéva de distìnguare tra “errante” e “eróre”.

Tùti i testimoni ghe ga testimonià ai processi canonici i concorda nel dire che, se el ga dimostrà “na energia inesoràbie, giustificàda in pieno dàea gravità dei perìcoi che inconbéva sóra a Césa, coi Modernisti el se ga dimostrà sénpre pièn de na carità insuperàbie e de na misericordia sénsa mesùra. [...] El voéva che se sperimentàsse tùti i mèsi umanamente possìbii par amonìrli e par persuàdarli dei so sbàgli, racomandàndoghe a tùti vivamente che no se mancàsse àea carità. [...] No li abandonàva a eóri stessi: li seguiva da distànte co òcio paterno, el tentava ogni via par riciamàrli sua rèta via, e se i se fùsse trovài in ristretésse economiche, el provedéva ànca al so sostentamento” ³².

Néa parte dispositiva de l'enciclica e misure cauteatìve previste contro i modernisti e gèra miràe, e e culminàva co a inposissión de on giuramento antimodernista (1 de seténbre del 1910), a riprova che Pio X gavéva vùo na soecitùdine costante par l'integrità del Depositum Fidei ³³.

Dal so ategiamento antagonistico davanti àe nòve idee e ai nòvi fermenti interni ed esterni àea Césa, xé nata a convinssión che papa Sarto sia sta on papa “retrògrado” e “reassionàrio”.

Non xé però mancài ànca interventi de portata originàe, riformatrìsse e de respiro universàe: uno de questi xé a costitussión apostòica Sapienti consilio, che riformava dàe fondamenta a curia romana (29 de giugno del 1908), a létara Quidquid consilii sóra l'unión dée Cése orientàe (8 de lùlio del 1908), e a létara apostòica ai vescovi de l'oriente sóra l'unione dée Cése del 26 de dissénbre del 1910, che sotoìnea sóeo uno dei aspèti ecumenici pì interessanti del pontificato de Pio X.

De influénsa particolare e eficàce xé sta a esortassión al clero Haerent animo, scrìta in ocasión déa ceebrassión del so giubileo sacerdotàe, che sarì i 50 àni de méssa (4 de agosto del 1908).

El 29 de seténbre del 1908, co a costitussión apostòica Promulgandi pontificias, el ga fondà el periodico Acta Apostolicae Sedis, che xé ancora l'unico organo de stànpa uficiàe déa Santa Sede par i problemi dotrinài e dissiplinari, che el sostituiva el préssedente Acta Sanctae Sedis, istituìo da Pio IX nel 1865.

In sèguito ga seguìo e encicliche Communium rerum, par el VIII Sentenàrio de Sant'Anselmo de Aosta (21 de aprìe del 1909), a letera Vinea electa, che riguardava a fondassión de l'Istituto biblico (7 de màgio del 1909), a Editae saepe, in ocasión del III Sentenàrio de San Carlo Borromeo (26 de màgio del 1910), e a Quam singulari Christus amore sóra a comunión dei putèi (8 de agosto del 1910), che xé una dée so pì famose encicliche eucaristiche, pròpio quéa che e ga vùo da dire: “sto documento me xé sta ispirà da Dio stesso”.

Ne l'ànbito sociàe i interventi de papa Sarto no xé stai de sèrto altisonanti come quéo del so predecessór Leone XIII, a Rerum novarum: ma xé da segnaeàre l'intervento par l'inaugurassión déa Scuòea Sociàe Catòica de Bergamo, el 15 de agosto del 1910, e a létara Notre charge apostolique del 25 de agosto del 1910, che ga condanà e teorie déa rivista Sillon de Marc Sangnier (Parigi, 1873-1950), che se ga prontamente sotomésso in modo pièn e incondissionà al voére del papa.

N'altro fàto da segnaeàre e da sotoineàre xé che durante el pontificato de Pio X se ga asistìo a na sensibiisassión e organisassión pì grande dée atività déa Césa a favore déa soiussión dei problemi de l'emigrassión.

Altri àti pontifici de Pio X xé stai a costitussión apostòica Divino afflatu, che portava vànti a riforma del breviario romano (1 de novénbre del 1911), a costitussión apostòica Etsi nos, che inponéva a riforma del vicariato de Roma (1 de genàro del 1912), l'enciclica Lacrimabili statu che intervegnìva sóe condissión disumane déi indios de l'America Latina (7 de giugno del 1912), l'enciclica Singulari quadam sói sindacati operai in Germania (24 de seténmbre del 1912) e la létara apostòica Universis Christifidelibus de l'8 de màrso del 1913, par el XVI Sentenàrio de Costantino.

Da l'esame dei àti del papa Pio X podarìa sorprendere el fàto che papa Sarto no sia mai intervegnùo a riguardo de argomenti siéntifici, ànca se quéi che el ga vissùo gèra àni che registrava el scardinamento dei fondamenti secoeàri della fisica, dato che vegnìva formueài quéi nòvi déa teoria dei quanti (1900) de Max Planck (1858-1947), déa teoria déa relatività ristréta (1905) de Albert Einstein (1879-1955) e de l'interpretassión atomistica e quantistica déa realtà fisica (1903-1913) par òpara sóra de tùto de Joseph John Thomson (1856-1940), de Ernest Rutherford (1871-1937) e de Niels Bohr (1885-1962).

Questo el xé on fàto pròpio strano, parché Giuseppe Sarto el ga sénpre coltivà studi sientìfici, co speciàe riguardo àea matematica e àea astronomia: el xé sénpre riussìo bén in sto tipo de studi, e quando che el gèra sóvene el ga esprèsso a so versatìità sientìfica néa costrussión de meridiane e, da papa, el ga seguìo da par suo l'atività déa Spècoea Vaticana, fondàda dal so predecessór Leone XIII ³⁴.

El deperimento progressivo déa so saiùte e e condissión poìtiche che se deteriorava sénpre de pì in Europa lo ga portà àea tomba. El 2 de agosto del 1914 el ga invià co tanta angòssia l'esortassión Dum Europa a tùti i cattolici del mondo, par inplorare a cessasión déa guèra europea péna scopiàda, che po sfociarà squàsi sùbito néa prima guèra mondiàe: el xé on apèo acorà par fenìre le ostiità e par trovare ogni strada par ea conposissión del conflìto, ne l'intarèsse superiór de l'umanità e déa pàse. El xé on testamento de pàse fra i pì alti e i pì sentìi che sia mai stai consegnài àe future generassión.

El xé morto àe 1.16 del 20 de agosto del 1914, de siòba. El xé sta sepeìo née gròte vaticane e sóra a so tónba xé stàe scrìte ste paròe: PIUS P.P. X - DIVES ET PAUPER - MITIS ET HUMILIS CORDE - REIQUE CATHOLICAE VINDEX FORTIS - INSTAURARE OMNIA IN CHRISTO - SATAGENS - PIE OBIIT DIE XX AUG. A. D. MCMXIV, che e riassùme na vita e on pontificato che xé stài vissùi a l'ónbra déa cróse e a l'insegna déa povertà pì rigorosamente vissùa ³⁵.

Pio X (Giuseppe Melchiore Sarto), papa dal 1903 al 1914.

I procèssi canònici diocesàni e apostòici (1923-1946)

A fama di Pio X come santo xé sénpre stàda sóa bóca de tùti. I agiògrafi de Pio X i assicura a fama déa so santità in vita e in morte, che dopo a so morte se ga anplificà sénpre de pì.

Squàsi nove anni dopo a so morte, el 14 de febràro del 1923, 28 cardinài ghe ga domandà al papa Pio XI a glorificassión de Pio X, e ga incaricà come postueàtore déa causa don Benedetto Pierami, on reigióso dei Benedettini Vallombrosani, abate de S. Prassede a Roma.

Questo el ga organisà i procèssi informativi ordinari diocesani, seebrài fra el 1923 e el 1931, in diocesi de Treviso (1923-26), de Mantova (1924-27), de Venèssia (1924-30) e de Roma (1923-1931), scoltàndo e trascrivéndo e depossión de 205 testimoni. Questo imàne lavoro xé sta fenìo l'8 de luglio del 1931.

Don Pierami xé morto de on colpo el 12 de agosto del 1934: el 18 de otóbre sucessìvo xé sta incaricà don Alberto Parenti, n'altro reigióso déa stéssa congregassión che, a conclusión dei studi sóra i procèssi ordinari, el 12 de febràro del 1943 el ga possùo dare àe stànpe a Positio super causae introductione, che de fàto introduséva a causa de beatificassión.

Tra el 1943 e el 1946 xé stai seebrài née quàtro diocesi i procèssi apostòici e xé stai sentìi 89 testimoni.

Tre àni pì tardi, nel 1949, xé stàda dàda àle stànpe a Positio super virtutibus.

Par el 1950 el papa Pio XII gavéva in ànemo a seebrassión de tre grandi avénimenti: el dogma de l'assunssión in ciéo déa Madòna, l'àno Santo e a beatificassión de Giuseppe Sarto, ma a l'ùltimo momento xé stae portàe serie considerassión sol conportamento tegnùo dal papa Pio X nel periodo déa lòta al Modernismo, e xé cossìta istruìo on procèsso straordinario, scomissiàndo dal 15 de dissénbre del 1949, seebrà a causa dée Animadversines che el promotore déa fede, Salvatore Natucci, gavéva scrìto. àea fine xé sta stanpà a Nova positio super virtutibus (1950) co on Summarium adissionàe de documenti.

Superàe tùte ste dificoltà, sta causa ga subìo na notévoe aceerassión: l'11 de febràro del 1951 xé stai riconossùi i do miràcoi che ghe voéva pàea beatificassión e el 4 sucessìvo de marso xé sta publicà el decreto cossìta dìto del Tuto, che ghe dava giuridicamente a possibiità di podére ndare vànti cóea glorificassión del papa vebeto, el primo papa santo dopo 400 àni, da S. Pio V.

El 3 de giugno 1951 xé avegnùa a soène cerimonia déa beatificassión. El papa Pio XII ga vùo paròe de efèto particoeàre su Pio X, e el ga dimostrà de èssare perfetamente cónsio déa conplessità storica de l'assión néa Césa del papa nato a Riese e pàroco de Salsàn, so predecessór, che ghe gèra ben in mente fin dal ténpo che el ga scomissià a so carièra diplomatica néa Segreteria de Stato Vaticana: el ga dìto che el papa Pio X, “col so sguardo de àquila el xé sta pì perspicace e pì sicuro déa vista curta de tanti miopi ragionatori” [...], e “iluminà dàea ciaréssa déa verità eterna, guidà da na cossiénsa deicata, iùcida, de rìgida diritùra”, el xé sta “on uomo, on pontefice, on santo de tàe eevatéssa” che “sarìa sta difìssie trovare on storico che sàpia inbrassàre tùta insieme a so figura e néo stésso ténpo tùti i so moltèplissi aspèti” ³⁶.

Òto mesi pì tardi, el 17 de febràro del 1952, a so venerata salma xé stàda deposta par sénpre sóto l'altare déa Presentassión drénto a Basìica de S. Pièro, a Roma.

A glorificassión e a fortuna de S. Pio X nel mondo de oncùo

Dopo a beatificassión, l'iter glorificatorio xé procedùo in mòdo spedìo: el 17 de genàro del 1954 xé stai riconossùi ànca i do miràcoi che ghe voéva pàea santificassión.

El 29 de màgio del 1954, davanti a 800.000 persone, Pio XII ga seebrà a cerimonia déa canonisassión.

Pio X el xé sta l'unico papa santificà dal XVII sècoeo in vànti: xé pàrso a tùti che se fùsse reaisàda a professìa de Il Giornale d'Italia, che gavéva scrìto: “A Storia ghe ne farà on gran Papa: a Césa ghe ne farà on gran Santo” ³⁷.

Xé cossìta scomissià i dièse àni déa fortuna de S. Pio X: el culto de S. Pio X xé sta sùbito portà in àlto, e tantissime cése in Italia e in tùto el mondo xé stae costruìe in onore del nòvo santo, co ànca on riflèsso positivo sóa iturgìa e sóra l'arte sacra contemporanea.

Ma dopo péna do iùstri sta fortuna ga scomissia a ndàre bàsso, parché durante a seebrassión del Concilio Vaticano II xé vegnùe fòra questión che riguardava Pio X in senso pitòsto negativo, sóra de tùto in riguardo dei rapòrti da tegnìre col mondo moderno.

Quando che xé vegnùo el periodo dopo el Concilio, el xé sta esaltà sóeo dai catòici tradissionaìsti, che i gavéva capìo sóeo in parte el mesàgio de Pio X, rifasséndose squàsi in modo esclusivo al momento antimodernista e de ciusùra àe istànse del mondo moderno: tanti de sti credenti xé deventài in seguito sismàtici, sóa ssìa de mons. Marcel Lefebvre (1905-1991) e déa so Fraternité Sacerdotale Saint Pie X di Econe, in Svìssera.

Al contrario, el xé sta denigrà dai catòici progressisti o conciliari, che i o ga definìo de volta in volta come intransigente, integraìsta, integrista, tradissionaìsta, reassionàrio e acentratóre.

In tùta a cristianità contemporanea dèsso i fedéi xè animài da sospèto, da apatia e/o indifarensa nei riguardi de Pio X, ànca se no xé mancàe espressión de riconossimento autorévoe dei so meriti, sà esposte da Benedetto Croce, e el so culto xé ancora difùso in tùto el mondo: el xé onorà come el papa de l'eucaristia e del catechismo, i missionari ghe xé grati par l'inpulso che el ghe ga inprèsso a favor dée Missión, el xé titoeàre de seminari, el xé conpatrono de diocesi, el xé el patrono déi emigrài trevisàni nel mondo (dal 1985) e dei esperantisti cattolici (dal 1951) ³⁸, el xé onorà come patrono in 86 paròchie italiane, 65 tedesche, 15 belghe, 18 canadesi, 89 americàne (Stati Uniti), 2 austriache, almànco 6 australiàne, sénsa parlare de quée spagnòe, olandesi, e parfìn giaponési!

I storici ga on giudìssio che xé ancora eontàn da èssare definitivo: e no pòe èssare in altro modo, visto che el xé morto sóeo da gnànca 90 àni e che el xé ancora, che se vòia o che no se vòia, on protagonista.

On pochi de sti storici i o giudica in modo negativo: tra de eóri, nel 1934, che sarìa na epoca che no xé sospèta (infàti, sà da 9 àni gèra sta messo in moto l'iter de canonisassión), el storico Joseph Schmidlin ghe ga dedicà on capìtoeo intièro e negativo a l'atività antimodernista del Sodalitium Pianum de mons. Umberto Benigni (1862-1934), formulando cossìta giudìssi negativi e gravi ànca contro Pio X, che gavarìa favorìo sta atività ³⁹.

Negativo xé sta el giudisio, ànca se el xé ristréto sóeo al pensiero poìtico del papa veneto, che don Luigi Sturzo ga dà nel 1937: secondo iù, Pio X “gavéva na idea squàsi parochiàe déa vita poìtica” ⁴⁰. So na epoca pì vissìna àea nostra, Rudolf Lill ga da na vaiutassión prevaentemente negativa del papato, e el ga mésso in evidensa sóeo l'antimodernismo reassionàrio e l'interpretassión esageràda de l'autorità del papa ⁴¹.

Altri stòrici ga invésse da ànca dèsso on giudìssio equiibrà e in parte positivo: el stòrico belga Roger Aubert o ga definìo “riformatore e conservatore a on tempo”, ma el ga afermà ànca che “Pio X, che xé apàrso ai so contemporanei cossìta poco moderno e cossìta conservatór, in realtà el xé sta uno dei papi riformatori pì grandi della Storia déa Césa, sicuramente el pì gràn riformatór déa vita interna déa Césa dopo el Concilio di Trento” ⁴².

El stòrico gesuìta padre Giacomo Martina ga da on giudìssio tùto somà insèrto, spèce par el fàto che “e indàgine fàte par el procèsso di beatificassión [...], se e ga mésso in iùce pì ciàra el profondo senso de responsabiità del papa e el so ardore par a difesa déa fede, [...] no e ga par gnìnte eiminà tùti i dùbi che xé nati so l'oportunità déa ìnea seguìa dal papa, e no ga persuaso in mòdo uguàe tùti i studiosi de sto periodo storico” ⁴³.

Positiva, ànca se co riserve, xé a posissión del stòrico venessiàn Silvio Tramontin (1919-97) che, se da na pàrte el ga mésso in risalto a dimensión reigiósa del pontificato e a difesa del patrimonio culturàe cristiàn, da che altro el ga afermà che na difesa cossìta baricàda e strènua ga spensùo el papa “pitòsto a frenare e a imitàre, che a promòvare e a favorire nei diversi cànpi de assión a atività déi òmeni de Césa” ⁴⁴.

Invésse pónta el déo sui ìmiti del procésso che ga portà àea canonisassión de Pio X on avocàto déa S. Congregassión pàe Cause dei Santi, Carlo Snider, che ga evidensià tùte e pèche che ghe gèra sóra de tùto dal punto de vista stòrico e metodoeògico, ma che in pratica restituìsse el personaggio de Pio X al so ténpo, e o còeoca néi àni che el ga vùo a óparare, contrariamente a quanto che ga fàto na agiografia cossìta tànto sucarósa che, par edificare el letóre, ga fenìo col dare on santo che gèra pròprio fòra del so tènpo ⁴⁵.

Al contrario, sostansialmente positiva e, quéo che cónta de pì, molto equilibrata xé sta a vaiutassión de Joseph Lortz e de Gianpaolo Romanato.

El primo ga scrìto che el vede l'òpara del papa Pio X come quéa de on “papa pastore de anime”, che vorìa dire che el gèra el lògico coronamento de de pì de sinquant'àni de ministero de on “seànte pastore de àneme”, che ga vùo a “percessión imediàda de tùto quéo che no gèra catòico”, che ga savùo coordinare e spinte contrastante che e derivàva dàea “tensión ogetivamente esistente tra pietà reigiósa e dirìto” ⁴⁶. El secondo xé ànca convinto che “ocóre soevàre ancora tanti véi par rivàre al vero Pio X déa storia”, e el riconósse l'inportànsa pièna de risultàti che ga vùo on'òpara pastoràe che a Césa ancora risente: a so ìnea pastoràe “sopravivéva ben oltre l'orisónte parochiàe dove che el se gavéva formà, e el riveàva na fecondità de aplicassión che forse no se fa gnancóra esaurìa”, e el scrìve che “el so pontificato [...] se còeoca, e no sóeo cronoeògicamente, al scomìssio déa Césa contemporanea. E tànte dée carateristiche del catoicèsimo del Novessénto, che sarìa el verticìsmo, a sòida organisassión giurìdica, a fèrea strutùra inteetuàe, ea vaeorisassión del laicato” catòico, e deriva tùte dàe riforme de Pio X, dàe so inissiatìve pastoràe, dàe so intussión carismàtiche: insóma, in do paròe, dàea so “visión eclesioeògica” ⁴⁷.

No manca de sèrto sòne de onbrìa, sóra dée quàe sarìa giusto e doveroso fàre iùce, interpretando prima de tùto i nòvi documenti de l'Archivio Vaticano, ma no se pòe fin da désso no métare in evidénsa el fàto che, ànca se el xé on “papa spartiacque” tra do modi de inténdare la vita déa Césa, el ga sénpre dimostrà na so sensibiità eclesiàe particoeàre: con gran coerensa de pensiero e de assión, el ga efetuà on gran sfòrso in tùta a so vita de prète par èssare fedée àea realtà reigiósa e sociàe del so ténpo, intervegnéndo ad hoc co a tenpestività riformistica che el so ténpo richiedeva e co na pastoraità pragmatica, informàda a on critèrio de aténta difesa del Depositum Fidei.

No xé mancài i giudìssi pesanti, i sbarlèfi satirici, e fràse fàte dissacratorie. Tra de quésti ghe ne sìto do. El primo xé anonimo (chi che o ga tirà fòra non ga vùo gnànca el bón gusto de firmàrse), ma no pòsso scóndarlo, parché el xé uno dée tante e màssa frequente senténse che xé sóa bóca de màssa sénte: “Nato nel Veneto asburgico, no el podéva se no “lonbardovenetisàre” a Césa, co tùti i ategiamenti opressìvi e acentratóri che tùto quésto conportàva”.

Pì irònica e, come che disarìa i inglesi e i americani, pì soft, ma no par questo mànco negativa, xé l'acùsa del càustico mons. Louis Marie Olivier Duchesne (1843-1922), che ghe ga inputà de vére trasformà, cóa so visión provinciàe déa Césa e co el so ristréto orisónte culturàe de prète che provegnìva dal Veneto pì profóndo, a fràgie barca de S. Pietro in so na góndoea de S. Pietro.

Co l'inteigénsa “del poi” se pòe rispóndare che, se el fùsse sta el sóeo patriarca de Venèssia a èssare elèto papa in sto secolo, se podarìa pensare a on schèrso déa Providénsa: tra tanti papi iùstri e “di spirto profetico dotati”, a podarìa èssarse concèssa na pausa so l'itineràrio déa salvéssa de l'òmo.

Ma sta finéssa elucubratìva càsca come on péro gnòco se se tièn in conto altre situassión anàeoghe: purtròpo par quéi che a pénsa cossìta, quéi che in sto secolo XX ga trasformà a barca de S. Pietro in so na góndoea de S. Pietro xé stai ben tre, e co i risultati che xé a tùti ben conossùi: oltre a Sarto, a storia registra ànca el beàto Angelo Giuseppe Roncalli (1881-1963), papa Giovanni XXIII, ed Albino Luciani (1912-1978), papa Giovanni Paolo I.

E tùti tre, vàrda che caso, patriarchi di Venèssia!

A proposito de Sarto, se pròpio voémo tegnìre conto dée critiche dei detratóri che ghe ne sa una de pì del Spirito Santo, invésse de maravegiàrse de l'elessión a papa de on uomo che gavéva na esperiénsa cossìta imitàda e de livèo regionàe, se gavarìa invésse da maravegiàrse del contrario, e cioè de el fàto che on òmo ritegnùo de cossì bassa caratura e co on orisónte mentàe cossìta provinciàe el gàbia savùo conportàrse da pastore déa Césa Catòica co tanta (forse màssa) fòrsa, sicuréssa e pùgno riformatore.

Se capìsse che a Providénsa, par preparare nel XX sècoeo el mesàgio cristiàn par el tèrso Miènio, dopo el 2000, par oltrepasàre e sògie déa sperànsa, prima de sto gran passo, a ga preferìo, e par ben tre volte, al tempestoso mare de Tiberìade na navigassión in ecosistemi a rìs-cio.

Come a eagùna de Venèssia dei cardinài Sarto, Rocalli e Luciani.

NOTE

¹ F. FRANCESCHETTI, Gli antenati del Sommo Pontefice Pio X. Memorie storico-genealogiche, Presso il Collegio Araldico, Roma, 1903, p. 21.

² A. MARCHESAN, Papa Pio X nella sua vita e nella sua parola, Stabilimenti Benziger e Co.S.A., Einsiedeln, 1905, pp. 23-25; l'albero genealogico déa famégia Sarto se tròva a p. 17.

³ A. GHENO, La patria di Pio X, Estratto dalla Rivista del Collegio Araldico, Anno I, N. 11 e 12, Presso il Collegio Araldico, Roma, 1903, p. 14.

⁴ Se pòe védare na recente ricostrussión dée vicende secoeàri dei Sarto nel me voiuméto Q. BORTOLATO, La casa natale di Pio X ed il museo di S. Pio X Cenni storici e catalogo museale, Fondazione G. Sarto, 1992, pp. 9-24.

⁵ Sta anotassión se trova drénto on registro canonico, on Stato d'anime sensa tìtoeo né data de conpiassión, conservà ne l'Archivio Parochiàe de Riese Pio X.

⁶ Xè in àto dal 1996, da parte déa pìcoea sità de Jemielnica, che se trova ne l'Alta Slesia, che dèsso xé sóto aministrassión poeàca, a rivendicassión de éssare sta el paese de nàssita de Giovàni Batìsta Sarto, el pàre de Giuseppe Sarto, el futuro papa Pio X: secondo quanto che dìse a stànpa del pòsto, el Panorama (N. 33, 18 de agosto del 1996), on poeàco de nome Jan Krawiec (che vorìa dire Sarto in poeàco) el sarìa emigrà in Italia quando che sta terra poeàca xé stàda incorporàda dàea Prussia (el toponimo Jemielnica equivàe al so nome tedesco Himmelwitz), e qua el gavarìa trovà na spèce de asìo poìtico, prima a Castèo de Godego e po dopo a Riese, dàndoghe cossìta origine àea famégia che xé nato el papa veneto. A sto giornàe ghe ga fàto in parte èco el Schlesisches Wochenblatt (N. 45, 8-14 de novénbre del 1996). Tùte ste notìssie qua e me xé stae comunicàe dal siór Jörg Horn, on giornaìsta de Koblenz, in Germania, che ànca el me ga invià bastànsa materiàe giornaìstico e che el me ga segnaeà el studio che a notìssia xé stàda tólta: M. MALACHI, The Keys of This Blood The Struggle for World Dominion Between Pope John Paul II, Mikhail Gorbachev, and the Capitalist West, New York, 1990, p. 535. Xé inùtie sotoineàre a falsità de tùti sti riferimenti, che pararìa secondo i poeàchi ben documentài, ma che invesse no i o xé; i documenti veri, che mi go visto on sàco de vòlte, i xé conservài drénto l'Archivio Parrochiàe de Riese: qua ghe xé tùti i àti e i documenti reatìvi a Giovanni Battista Sarto (àto de nàssita, de matrimonio e de morte, avegnùa a causa de “pleuritide”) e a tùta a só famégia.

⁷ Drénto l'Archivio Parrochiàe de Riese xé conservà on Elenco delle Famiglie Povere della Parrocchia di Riese: xé elencàe 132 famégie co on totàe de 538 persone so 1848 àneme (29,11% déa popoeassión); na postìa avèrte che “se podarìa sontàre i seguenti”: sègue 10 famégie e 42 individui, par on totàe de 142 nuclei fameiàri e 580 poaréti (31,39%). Fra de eóri no xé sità gnànca on Sarto: questa xé a ripròva che a famégia Sarto no gèra da considerare indigente e bisognosa, come che na egénda nata tórno de Giuseppe Sarto anca oncùo ténde a egìtimare: se de povertà dei Sarto se ga pròpio da parlare, se o pòe fare sóeo in modo circoscrìto, e a partire dàea morte de Giovanni Battista Sarto in vànti, e partànto dal 1852, àno che Margherita Sanson se ga trovà a dover mantegnére a so famégia co quéo che ghe portàva drénto in casa el so eavóro de “cucitrice” (sartóra) e cói prodóti de l'atività agrìcoea sui so cànpi. Che ànca so fiòeo, oramai prète, no noàsse ne l'oro xé bén documentà. Infàti, don Giuseppe Sarto in do létare del 1875 el ringrassiàva el siór Antonio Monico de Riese par vére rimandà a riscossión de on dèbito de “Lire Austriache 1000 (Mille) al 6% da restituire drénto l'àno 1868”: ma, ànca se el gèra sta contràto fin da l'ultimo àno de Tombolo, e par èssare precisi nel 1867, no el gèra gnancóra sta onorà. E le proprietà de Riese, che ghe gèra apartegnùe ai so vèci? “I do ètari de eredità de so pàre i gèra stai vendùi, co àti scrìti in data 2 de dissénbre del 1877, a Monico Antonio e a Montin Pietro. ànca a caséta dove che el gèra nato, minaciàda de èssare vendùa, a gèra stàda salvàda a l'ultimo momento”: G. SARTO, Lettere di S. Pio X, a cura di NELLO VIAN, Gregoriana Editrice, Padova, 1958, p. 72. E ànca fra el 1886 e el 1888, oramai vescovo de Mantova, el ga vùo problemi co debiti. Nel 1886 “iù co so fradèi el ga vendùo, ultimo avànso de el so patrimonio de famégia, 34 pertiche de terén, che corispondéva a sìrca 3 ètari e mèso de terén, che provegniva dàea división co on so sìo”: G. SARTO, Lettere di S. Pio X, a cura di NELLO VIAN, Gregoriana Editrice, Padova, 1958, p. 139 (xé da védare ànca e pp. 55, 57, 138-139, 167-169, 263).

G. Romanato, sitàndo na létara scrìta da Sarto, quando che el gèra capeàn de Tombolo in aprìe del 1866, a so cugìn che portàva el so stésso nome, Giuseppe Sarto, che el stava a Venèssia, el conclude che “fin àea morte de so pàre, i Sarto ga possùo gòdare de na situassión economica bastànsa tranquìa. Tutavìa, e se o capìsse ciàro e tóndo dàe paròe del fiòeo, Giambattista no gèra sta on aministratóre particoearmente ocueà, e prima de morire, el se gèra caricà de dèbiti. Dopo a so sconpàrsa, somàndose al mancàre inprovìso dei so guadagni, i dèbiti i ga schissà leteralmente a famégia, tànto che nel 1866, quando che xé stàda scrìta a létara péna sitàda, (e sarìa pasài quatòrdese àni dopo el 1852), a situassión no se gèra gnancóra riequiibràda, e a sarìa restàda precaria almànco par n'àltri dièse àni”: G. ROMANATO, Pio X La vita di Papa Sarto, Rusconi, Milano, 1992, p. 66.

⁷ De sto undicesimo fiòeo dei coniugi Sarto-Sanson, vissùo sóeo par 12 giorni, nissùn biografo ga mai parlà fin dèsso, al de fòra de mi. A documentassión se trova drénto l'Archivio Parrochiàe de Riese: Registro dei morti Libro Secondo Parrocchia di Riese dal dì 1.° Gennaio 1829. al 10. Febbrajo 1845, N. 11: el xé morto di “affezione spasmodica il dì 8 Febbrajo 1845 alle 5. pomerid. in casa propria”.

⁸ A. MARCHESAN, Pio X nella sua vita e nella sua parola, Benziger & Co. S. A., Svizzera, 1904-05, p. 26.

⁹ I stòrici pì acreditài e vari studi agiografici ripòrta a data, posticipàda de on àno, del 6 de aprìe del 1847, ma el conpiànto prof. Alessandro Favero (S. Zenone degli Ezzelini, Treviso, 27 luglio 1916-Riese Pio X, 25 gennaio 1990) nel 1965 ga publicà i risultàti dée so rissérche archivistiche: Ignis ardens, bollettino bimestrale di Riese Pio X, Anno XIII, n. 2, Marzo-Aprile 1965, pp. 13-14. L'elenco dei cresemài néa catedràe de Asóeo da mons. Sartori Canova el 1° de seténbre del 1845 xé drénto el Libro dei cresimati dal 7 Giugno 1777 al 28 Settembre 1871, dove che risùlta registrài 140 putèi de Riese; al n. 58 xé scrìto “Sarto Giuseppe di Giovanni Battista e Margherita Sanson d'anni 10. Padrino Francesco Trinca di Vallà”. Co el stesso sàntoeo xé registrà al n. 59 so fradèo àngeo de 8 àni. De l'aprìe del 1846 xé on elénco de 13 putèi e 17 putèe, “da ammettersi alla Comunione nel 1846”: al primo posto dei mas-ci xé riportà el nòme de “Sarto Giuseppe di Giovanni Battista - anni 11 - approvato”.

Tùta a documentassión sitàda se trova drénto l'Archivio Parrochiàe de Riese

¹⁰ A. GAMBASIN, Parroci e contadini nel Veneto alla fine dell'Ottocento, Ed. di Storia e Letteratura, Roma, 1973, p.192-193.

¹¹ So sorèa del papa, Lucìa, néa so deposissión al procèsso canonico ordinario, pur afermàndo che so pàre el gèra on “bón cristiàn”, ea ga sotoineà che “no el gèra afàto contento che el Servo de Dio se fasésse prète e qualche volta ghe xé sta barùfa coéa màma e el papà. [...] El ga dovùo lotàre col papà che no voéva assàrlo ndàre pàea carièra eclesiastica”: G. ROMANATO, Pio X La vita di Papa Sarto, Rusconi, Milano, 1992, p.26.

¹² Par vére on poche de notìssie biobibliografiche sóra de Jacopo Monico, se pòe védare i voiùmi: A. MARCHESAN, Pio X nella sua vita e nella sua parola, Benziger e Co. S. A., Einsiedeln, 1904-05, pp. 50-57, e AA. VV., Le visite pastorali di Jacopo Monico nella diocesi di Venezia (1829-1845), a cura di BRUNO BERTOLI e SILVIO TRAMONTIN, Ed. di storia e letteratura, Roma, 1976, p. CXCVII-407.

¹³ El Coègio Tornacense Campion gèra na istitussión fondàda da Pietro di Cambio de' Boateri, che a provedéva a mantegnére siè chierici poaréti che i studiava Dirìto Canonico a l'Università de Padova. Organisadór del Coègio Campion xé sta specialmente Albicio dei Brancasecchi de Lucca, canonico de Tournai (Tornacensis), in Belgio: l'istitussión xé stàda vèrta a Padova vissìn al pósso dìo Campion (che sarìa a seconda denominassión), che corisponde dèsso a l'atuàe CUAMM (Collegio Universitario Aspiranti Medici Missionari); i cosidéti “grassiàndi” (quéi che gavéva da otegnìre l'aiuto) i gavéva da provègnare dàe diocese de Padova, de Treviso, de Venèssia e de Tournai in Belgio: I. DANIELE, San Pio X alunno del seminario vescovile di Padova (13 novembre 1850-14 agosto 1858), Istituto per la Storia Ecclesiastica Padovana, Padova, 1987, p. 13 n. 7.

¹⁴ N. VIAN, Avemaria per un vecchio prète Intermezzi aneddotici lungo la vita di san Pio X, Marton Editore, Treviso, 1977, pp. 5-18.

¹⁵ G. ZAGGIA, Una raccolta di musiche sacre di Giuseppe Sarto (poi S. Pio X), chierico nel seminario di Padova, in Fonti e ricerche per la storia ecclesiastica padovana, Antoniana, Padova, 1969, pp. 339-45.

¹⁶ G. ROMANATO, Pio X La vita di papa Sarto, Rusconi, Milano, 1992, p. 38.

¹⁷ A. MARCHESAN, Pio X nella sua vita e nella sua parola, Benziger e Co. S. A., Einsiedeln, 1904-05, p. 110.

¹⁸ F. TONOLO, Come da parroco Pio X insegnò il catechismo Il catechismo manoscritto di don Giuseppe Sarto, in “Catechesi”, XXIII (1954), pp. 367-376. Testi e documenti di vita spirituale e azione pastorale, a cura di GIUSEPPE BADINI, anno XXI, Edizioni Paoline, Roma, 1975, pp. 101-225; pp. 337-345.

¹⁹ A. NIERO, Esperienze e riforme liturgiche, in AA. VV., Le radici venete di San Pio X Saggi e ricerche a cura di SILVIO TRAMONTIN, Morcelliana, Brescia, 1987, p.52.

²⁰ Vittorio Allegri xé sta na singoeàre figura de prète, che gnancóra no xé stàada del tùto ben capìa dal punto de vìsta stòrico e eclesiàe. Par vére qualche conossénsa a riguardo, se veda sti ìbri: E. BACCHION, Salzano Cenni storici, Ristampa anastatica a cura dell'Amministrazione Comunale di Salzano, con una nota introduttiva di Silvio Tramontin e una scheda bio-bibliografica di Quirino Bortolato, Amministrazione Comunale di Salzano, Multigraf, Spinea, 1986, pp. 65-66, 75; E. BACCHION, Pio X Giuseppe Sarto Arciprete di Salzano (1867-1875), Amministrazione Comunale di Salzano con il patrocinio della Fondazione Giuseppe Sarto, Multigraf, Spinea, 1996, p. 214+112; AA. VV., La Casa di Riposo “Don Vittorio Allegri” dalle origini ai giorni nostri, Studiostampa - Tipo-offset “La Commerciale”, Piombino Dese, 1974, p. 158.

²¹ E. BACCHION, Salzano Cenni storici, Ristampa anastatica a cura dell'Amministrazione Comunale di Salzano, con una nota introduttiva di Silvio Tramontin e una scheda bio-bibliografica di Quirino Bortolato, Amministrazione Comunale di Salzano, Multigraf, Spinea, 1986, pp. 112-116; E. BACCHION, Pio X Giuseppe Sarto Arciprete di Salzano (1867-1875), Amministrazione Comunale di Salzano con il patrocinio della Fondazione Giuseppe Sarto, Multigraf, Spinea, 1996, pp. 93-95.

²² [E. BACCHION], Un aneddoto della vita del Parroco Sarto, in Salzano al suo pastore In commemorazione del giubileo sacerdotale di Mons. Arciprete, Salzano, 18 agosto 1946, Eugenius Bacchion junior curavit, Venèssia, Stamperia Marciana, 1946. Se pòe consultàre ànca E. BACCHION E., Pio X Giuseppe Sarto Arciprete di Salzano (1867-1875), Amministrazione Comunale di Salzano con il patrocinio della Fondazione Giuseppe Sarto, Multigraf, Spinea, 1996, pp. 72-73.

²³ G. ROMANATO, Pio X La vita di papa Sarto, Rusconi, Milano, 1992, pp. 145-186.

²⁴ Tùte do e citassión e se trova in G. DAL-GAL, Il papa santo Pio X Vita ufficiale della Postulazione per la Causa di Canonizzazione, Il Messaggero di S. Antonio, Padova, 1954, pp. 56-57.

²⁵ A seébrassión dei Congrèssi eucaristici italiani ga vùo inìssio a Napoli nel 1891, e a ga continuà a Torìn nel 1894, a Miàn nel 1895, a Orvieto nel 1896 e a Venèssia nel 1897, che xé l'ultimo de l'Otossénto. Fin al 1920 no i ga pi vù eògo: l'interussión xè stàda dovùa àea mancànsa de on Comitato organisatór italiàn e àea Prima Guerra Mondiale. Se conclùde cossìta che durante el pontificato de Pio X, che pùre xé sta dìto el “papa de l'eucarestia”, no xé stàda curàda nissùna manifestassión eucaristica de livèo nassionàe, ma al contràrio, ga vùo eògo divèrsi Congrèssi de livèo internassiónàe (Angoulême, 1904; Colonia, 1909; Madrid, 1911; Malta, 1913).

²⁶ G. ROMANATO, Giuseppe Sarto e il Movimento cattolico, in AA. VV., Le radici venete di San Pio X. Saggi e ricerche a cura di Silvio Tramontin, Morcelliana, Brescia, 1987, p. 125.

²⁷ Unione Cattolica per gli Studi Sociali in Italia, Atti e documenti del secondo Congresso Cattolico Italiano degli studiosi di Scienze Sociali tenutosi in Padova nei giorni 26, 27, 28 agosto 1896, Tipografia del Seminario, Padova, 1897, p. 108.

²⁸ E. VERCESI, Tre Papi, Edizioni Athena, Milano, 1929, p. 175.

²⁹ El mòto se trova in Efesini 1, 10, ma tànte xé e tradussión e i significati che ghe vièn atribuìi. Pa esénpio, una de queste xé: El diségno de ricapitoeàre in Cristo tùte e cose, quée del siéo come quée déa tèra. Néa so benevoénsa lo gavéva in iù prestabiìo par reaisàrlo néa pienéssa dei ténpi: P. BELTRAME QUATTROCCHI, I salmi preghiera cristiana Salterio corale, IX edizione, Benedettine, S. Agata sui due Golfi (NA), 1986, p. 409.

A ste parole fa èco, in Coloss. 3, 11, on concèto paolino anàeogo. Se èse: Qua no ghe xé pì Greco o Giudeo, circoncisión o incirconcisión, barbaro o Scita, s-ciàvo o ìbaro, ma Cristo xé tùto in tùti: La Sacra Bibbia, Edizione ufficiale della CEI, Ed. Conferenza Episcopale Italiana, UECI, 1974, pp. 1175.

El mòto de Pio X Instaurare omnia in Christo xé sénpre sta tradóto, co on no malceà conpiassimento e co on spìrito de contraposissión àea cultura del mondo, co el significato de Restaurare in Cristo tùte e cose, e questo xé è sénpre sta inteso esclusivamente in on senso integrista, integraìsta e reassionàrio, de restaurassión apùnto. Ma se el vièn raportà ai ténpi che el xé sta pronunsià, el va invésse capìo co on significàto pì moderno, ànca con na eògica che par tànti aspèti a antìssipa l'ultimo Concilio Vaticano II, e sarìa a dire: Ripoearisassión de ogni cosa in Cristo e de Rifondassión de tùto in Cristo, co on significato pì profondo e pì gràndo, racòlto cóeo spirito dei “ténpi maùri” sóeo dal Concilio che xé sta sità, che ga invità i cristiani a èssare veramente tài sóeo se i fonderà, ogni giorno e in ogni ocasión, a pròpia vita sóra a paròea de Cristo. Adèsso se tradùse ànca “ricapitoeàre”, “unificare”, “riunire”, “fondare”, “rifondare”. In Germania se tradùse Alles in Christus erneuern, che vorìa dire Rinovàre ogni cosa in Cristo.

³⁰ Nissùn papa prima de Pio X gavéva “mai eseguìo e prescrissión del Concilio de Trento, de fare na Visita Pastorale” àea sità de Roma”, in quanto apùnto vescovo de quéa sità. Sei véda el esauriénte intervento de Gianpaolo Romanato e de Silvio Tramontin in AA. VV., “Quaderni della Fondazione Giuseppe Sarto”, 1, gennaio 1990, pp. 19-45, in particoeàre a p. 32.

³¹ [F. ANTONELLI], Sacra Rituum Congregatio Sectio Historica n. 77 Romana Beatificationis et Canonizationis Servi Dei Pii Papae X Disquisitio circa quasdam obiectiones modum agendi Servi Dei respicientes in Modernismi debellatione una cum Summario Additionali ex Officio compilato, Typis Polyglottis Vaticanis, 1950, p. 303.

³² G. DAL-GAL, Il papa santo Pio X Vita ufficiale della Postulazione per la Causa di Canonizzazione, Il Messaggero di S. Antonio, Padova, 1954, pp. 185-186.

³³ A. ZAMBARBIERI, Voce Pio X, in AA. VV., Dizionario storico del movimento cattolico in Italia. Vol II: I protagonisti, Marietti, Torino, 1982, pp. 486-95.

³⁴ I. DANIELE, San Pio X alunno del seminario vescovile di Padova (13 novembre 1850- 14 agosto 1858), Istituto per la Storia Ecclesiastica Padovana, Padova, 1987, p. 17-41; S. MAFFEO S. J., Nove papi una missione Cento anni della Specola Vaticana, Pontificia Academia Scientiarum, Città del Vaticano, 1991, pp. 52-56.

³⁵ Ste paròe bén se adàta a quanto che el ga scrìto nel so testamento oeògrafo: “Nato poaréto, vissùo poaréto e sicuro de morir pì poaréto ancóra”: G. ROMANATO, Pio X La vita di papa Sarto, Rusconi, Milano, 1992, pp. 289-90. ànca se el gèra eóntan nel mòdo pì assoiùto da l'acetassión de onóri umani, el ga dovùo acetàre che a so famégia deventàsse nòbie: “A famégia, in virtù déa Bóea Benedetìna Urbem Romam del 1746, a xé stàda agregàda àea nobiltà romana, e in conseguénsa a xé iscrìta ne l'Elenco Nobiliare Italiano co el tìtoeo de nòbie romano (mf.), in persona dei dissendenti dai fradèi del papa Pio X”: V. SPRETI, Enciclopedia storico-nobiliare italiana, vol. II, Forni Editore, Bologna, 1969 (Rist. anastastica dell'ed. di Milano, 1928-35, p. 447).

³⁶ P. L. OCCELLI, Il Beato Pio X Il papa che morì povero, Ed. Paoline, 2^a Ed., Bari, 1951, p. 285; V Ed., pp. 347-48.

³⁷ L'ultimo xé sta Pio V (Paolo Ghislieri, Bosco (Alessandria), 17 gennaio 1504-Roma, 1° maggio 1572), el papa déa vitòria de Lepanto, vissùo nel periodo déa Controriforma, beatificà 100 àni dopo a so morte el 1° de maggio del 1672 e canonisà el 22 de màgio del 1712, patrono déa Congregassión del S. Uffizio, oncùo mèio conossùa come Congregassión déa Dotrìna déa Fede.

E paròe sitàe se trova ne Il Giornale d'Italia del 22 de agosto del 1914. El Giornale gèra sta fondà a Roma el 15 de novénbre del 1901 da Sidney Sonnino e da altri esponenti déa destra liberàe e anticlericàe; el xé famoso par el spàssio che el ghe ga da ai temi culturài déa “tèrsa pàgina”, ideàda da Alberto Bergamini (1871-1962), el so diretór dal 1901 al 1923, e pubblicà per ea prima volta el 9 de dissénbre del 1901.

³⁸ “A so beatificassión (3 de giugno del 1951) xé stàda saiudàda co gràn gioia dai partessipànti al 23° Congrèsso dell'IKUE a Monaco di Baviera, e Pio X xé sta proclamà "patrono ceèste déi esperantisti catòici"”. L'IKUE, cioè a Internacia Katolika Unuiào Esperantista (Unión Internassionàe Catòica Esperantìsta), a xé l'organisassión mondiàe déi esperantisti catòici: fondà nel 1910, a coeàbora dal 1951 co l'UEA, Universala Esperanto-Asocio (Asociassión Universàe Esperantìsta), a xé stàda riconossùa uficialmente dàea Santa Sede, e a ga come scopi fondamentài l'evangeisassión, l'unità déa Césa, l'interconprensión umana, l'ecumenismo, a fradeànsa fra i pòpoi e a pace. L'organo uficiàe, “Espero Katolika” (Sperànsa catòica), xé sta fondà nel 1903 e el ga portà in prima pagina na poesia, dedicà a papa Pio X da l'autore, el prète lituàno Alessandro Dombrowski (1860-1938). Se pòe consultare a sto propòsito: C. SARANDREA, Discernimento dei papi da San Pio X a oggi sul carisma dei cattolici esperantisti, relassión èta al 10° Congresso della UECI (Unión Esperantisti Catòici Italiani), tegnùo a Paderno del Grappa (Treviso) dal 6 al 10 seténbre 1996. Néa stéssa reassión si pòe èsare fàti che molto interesànti. El 2 de giugno del 1906, “nel corso de l'udiénsa el Pontefice ga esprèsso a so sinpatìa par el nòvo idioma” (p. 2); “El papa Pio X xé restà paternamente vissìn al movimento esperantista: dal 1906 al 1914 El ga invià ogni àno a So benedissión a “Espero Katolika”, ài esperantisti catòici” (p. 3); “El 4 de aprìe del 1909, Frate Isidoro Clé” xé sta ricevùo in udiénsa dal papa Pio X: xé sta in sta udiénsa che San Pio X ga pronunsià a frase profetica: "L'Esperanto ga davanti a iù on gràn avenìre"” (pp. 3-4). In altre ocasión el ga concèsso a benedissión apostòica e l'indulgénsa. Altre notìssie se pòe trovare in C. SARANDREA, Kvazaù historio, in “Espero Katolika”, 12 (1983), pp. 192-203 e in J. KORYTKOWSKI, Internacia lingvo en Eklezio kaj mondo, IKUE-Centro, Roma, 1976, pp. 131-32 e, ànca in versión italiana, in J. KORYTKOWSKI, La Chiesa e il problema della lingua ausiliare internazionale, Pontificio Ateneo Antoniano, Roma, 1976, p. 116.

³⁹ J. SCHMIDLIN, Papstgeschichte der neuesten Zeit Pius X und Benedikt XV, vol. III, Kosel und Pustet, München, 1934, pp. 1-170, co particoeàre riguardo àe pp. 162-169. El Reatóre Generàe francescàn F. Antonelli riferìsse che Schmidlin gèra “un storico on pochéto parsiàe”: [F. ANTONELLI], Sacra Rituum Congregatio Sectio Historica n. 77 Romana Beatificationis et Canonizationis Servi Dei Pii Papae X Disquisitio circa quasdam obiectiones modum agendi Servi Dei respicientes in Modernismi debellatione una cum Summario Additionali ex Officio compilato, Typis Polyglottis Vaticanis, 1950, p. XXIII.

⁴⁰ L. STURZO, Chiesa e Stato Studio sociologico-storico, vol. II, Bologna, 1978, p.153.

⁴¹ R. LILL, Storia ecumenica della Chiesa, Queriniana, Brescia, 1981, vol. II, p. 221.

⁴² R. AUBERT, in AA. VV., Storia della Chiesa, diretta da H. JEDIN, vol. IX, Jaca Book, Milano, 1979, pp. 457-630; in AA. VV., Nuova Storia della Chiesa, vol. V/1, Marietti, Torino, 1977, pp. 21-265.

⁴³ G. MARTINA, La Chiesa nell'età del totalitarismo, Morcelliana, Brescia, 1984⁵. p. 78-79.

⁴⁴ S. TRAMONTIN, Un secolo di Storia della Chiesa Da Leone XIII al Concilio Vaticano II, Studium, Roma, 1980, vol. I, pp. 51-104.

⁴⁵ C. SNIDER, L'episcopato del Cardinale Andrea C. Ferrari I tempi di Pio X, vol. II, Neri Pozza, 1982, pp. 131-208.

⁴⁶ J. LORTZ, Storia della Chiesa considerata in prospettiva di storia delle idee, vol. II, Ed. Paoline, Alba (Cuneo), 1973, pp. 490-91.

⁴⁷ G. ROMANATO, Giuseppe Sarto e il Movimento cattolico, in AA. VV., Le radici venete di San Pio X. Saggi e ricerche a cura di SILVIO TRAMONTIN, Morcelliana, Brescia, 1987, p. 142-44. G. ROMANATO, Pio X La vita di papa Sarto, Rusconi, Milano, 1992, pp. 6-8. De Romanato xé ànca da ricordare el pressióso coordinamento de 40 autori che ga portà àea publicassión de AA. VV., Pio X Un papa e il suo tempo, Ed. Paoline, Cinisello Balsamo, 1987, p. 326.

BIBLIOGRAFIA ESSENZIALE

• AA. VV., Le radici venete di San Pio X. Saggi e ricerche a cura di SILVIO TRAMONTIN, Morcelliana, Brescia, 1987.
• AA. VV., Pio X Un papa e il suo tempo, a cura di GIANPAOLO ROMANATO, Ed. Paoline, Cinisello Balsamo, 1987, p. 326.
• AA. VV., Giuseppe Sarto Un Vescovo e la Società mantovana alla fine dell'Ottocento Atti del Convegno, Mantova 19 aprile 1985, a cura di don GIANCARLO MANZOLI e di CARLO MICHELI, Mantova, 1995.
• AA. VV., Seminario Vescovile di Mantova "Una storia da riscoprire" Atti del Convegno di studio in occasione del IV Centenario della fondazione, Mantova, 1995.
• R. AUBERT, A proposito del volume “Pio X Un papa ed il suo tempo”, in “Quaderni della Fondazione Giuseppe Sarto”, 1, 1990, pp. 9-18. El ribadìsse a so visión del Sarto, sa esprèssa in altre pubblicassión precedénte: si pòe consultare, par esénpio, el contribùto de R. AUBERT in AA. VV., Storia della Chiesa, diretta da H. JEDIN, vol. IX, Jaca Book, Milano, 1979, pp. 457-630; AA. VV., Nuova Storia della Chiesa, vol. V/1, Marietti, Torino, 1977, pp. 21-265.
• E. BACCHION, Pio X Giuseppe Sarto Arciprete di Salzano (1867-1875) Con note integrative ed indici a cura del prof. Quirino Bortolato, Amministrazione Comunale di Salzano con il patrocinio della Fondazione Giuseppe Sarto, Multigraf, Spinea, 1996, p. 214+112.
• [G. BADINI], Testi e documenti di vita spirituale e azione pastorale, in l'Annuario del parroco, anno XXI, Edizioni Paoline, Roma, 1975.
• Q. BORTOLATO, La casa natale di Pio X ed il museo di S. Pio X Cenni storici e catalogo museale, Fondazione G. Sarto, Riese Pio X, 1992.
• F. CRISPOLTI, Pio IX Leone XIII Pio X Benedetto XV (Ricordi personali), Ed. Treves, Milano-Roma, 1932. De Pio X se parla àe pp. 83-139.
• G. DAL-GAL, Il papa santo Pio X Vita ufficiale della Postulazione per la Causa di Canonizzazione, Il Messaggero di S. Antonio, Padova, 1954.
• I. DANIELE, San Pio X alunno del seminario vescovile di Padova (13 novembre 1850-14 agosto 1858), Istituto per la Storia Ecclesiastica Padovana, Padova, 1987.
• F. DA RIESE PIO X-A. SARTORETTO, Scritti inediti di San Pio X (1858-1884), vol. I, Ed. Laurenziane, Padova, 1971; Scritti inediti di San Pio X (1875-1884), vol. II, Ed. Laurenziane, Padova, 1974.
• A. MARCHESAN, Papa Pio X nella sua vita e nella sua parola Studio storico del suo vecchio allievo il Sac. Dott. Angelo Marchesan, Stabilimenti Benziger e Co.S.A., Einsiedeln, 1904-05, pp. 588; na seconda edissión, legermente ampliàda, xé stàda publicàda sìnque àni pì tardi: A. MARCHESAN, Pio X nella sua vita, nella sua parola e nelle sue opere, Desclée, Roma, 1910, pp. 588 + XV.
• L. NORDERA, Il catechismo di Pio X Per una storia della catechesi in Italia (1896-1912), Libreria Ateneo Salesiano (LAS), Roma, 1988.
• A. PAGLIALUNGA, Lorenzo Perosi, Ed. Paoline, Roma, 1952.
• G. PAROLIN, San Pio X Dalla casetta di Riese alla raggiera del Bernini, Ancora, Milano, 1968.
• G. ROMANATO, Pio X La vita di papa Sarto, Rusconi, Milano, 1992.
• G. SARTO, Lettere di S. Pio X, a cura di NELLO VIAN, Gregoriana Editrice, Padova, 1958.
• G. SARTO, Le pastorali del periodo veneziano (1894-1898), a cura di ANTONIO NIERO, “Quaderni della Fondazione Giuseppe Sarto”, 2, 1990; G. SARTO, Le pastorali del periodo veneziano (1899-1903), a cura di ANTONIO NIERO, “Quaderni della Fondazione Giuseppe Sarto”, 3, 1991.
• C. SNIDER, L'episcopato del Cardinale Andrea C. Ferrari I tempi di Pio X, Neri Pozza, Vicenza, 1982.
• F. TONOLO, Come da parroco Pio X insegnò il catechismo Il catechismo manoscritto di don Giuseppe Sarto, in “Catechesi”, XXIII (1954), pp. 367-376.
• S. TRAMONTIN, Un secolo di Storia della Chiesa Da Leone XIII al Concilio Vaticano II, 2 voll., Studium, Roma, 1980.
• E. VERCESI, Tre Papi, Edizioni Athena, Milano, 1929.
• N. VIAN, Avemaria per un vecchio prète Intermezzi aneddotici lungo la vita di san Pio X, Marton Editore, Treviso, 1977.
• A. ZAMBARBIERI, Voce Pio X, in AA. VV., Dizionario storico del movimento cattolico in Italia. Vol II: I protagonisti, Marietti, Torino, 1982, pp. 486-95.
• P. ZOVATTO, Ricerche su S. Pio X, Università di Trieste, Facoltà di Magistero, III Serie, n. 20, Del Bianco, Udine, 1989.

SCHEDA CRONOLOGICA

1835	2 giugno	Nàssita de Giuseppe Melchiore Sarto a Riese (Treviso).
1846-1850		Quàtro àni de ginasiài a Castelfranco Veneto (Treviso).
1850	19 seténbre	Vestissión clericàe a Riese dal pàroco Don Tito Fusarini.
	13 novénbre	Ingrèsso nel seminario de Padova.
1858	18 seténbre	Ordinassión sacerdotàe a Castelfranco Veneto dal vescovo G. Antonio Farina.
	13 novénbre	Capeàn a Tombolo.
1867	14 lùlio	Pàroco a Salsàn.
1875	28 novénbre	Canonico déa catedràe de Treviso, diretór spirituàe del seminario, cancelièr déa curia vescovìe.
1884	16 seténbre	Nomina come vescovo de Mantova.
	16 novénbre	Consacrà vescovo in S. Apoinàre a Roma.
1885	19 aprìe	Ingrèsso a Mantova come vescovo.
1888	10 seténbre	L'indìse el Sinodo diocesàn.
1893	12 giugno	Creà cardinàe col titolo de S. Bernardo àe Tèrme.
	15 giugno	Nominà patriarca di Venèssia.
1894	2 febràro	Morte de so màma Margherita Sanson a Riese.
	24 novénbre	Ingrèsso e acoliénsa trionfàe a Venèssia.
1901	4 agosto	Saìta sol Monte Gràpa par benedire el sacèo e a statua déa Madòna.
1903	4 agosto	Elèto papa, el tòe su el nòme de Pio X.
	9 agosto	Incoronassión néa Basìica de S. Pièro.
	4 otóbre	Enciclica programàtica E supremi apostolatus cathedra.
	22 novénbre	Riforma déa musica sacra col motu proprio Tra le sollecitudini.
1904	20 genàro	Condàna del veto cóea costitussión Commissum nobis.
	2 febràro	Enciclica Ad diem illum par el 50° del dogma de l'Imacoeàta.
	19 màrso	Codificassión del dirìto canonico con il motu proprio Arduum sane munus.
1905	15 aprìe	Enciclica Acerbo nimis sóra el catechismo.
	20 dissénbre	Enciclica Sacra Tridentina Synodus sóra a eucarestia.
1906	11 febràro	Enciclica Vehementer sóra a separassión Césa-Stato in Francia.
1907	8 seténbre	Enciclica Pascendi dominici gregis sol Modernismo.
	29 giugno	Riforma déa curia romana cóea costitussión apostòica Sapienti consilio.
1908	18 seténbre	Giubilèo sacerdotàe. Esortassión al clero Haerent animo.
1909	7 màgio	Eressión de l'Istituto Biblico co a letera Vinea electa.
1910	8 agosto	Decreto Quam singulari Christus amore sóa comunióne ai putèi.
1914	2 agosto	Esortassión Dum Europa par implorare a cessassión déa guèra.
	20 agosto	Morte de Pio X àe 1.16.
1923	28 giugno	Inaugurassión del monumento a Pio X drénto àea Basìica de S. Pièro.
1923-1931		Procèssi diocesani a Roma, Venèssia, Mantova e a Treviso.
1943	12 febràro	Decreto par l'introdussión déa Causa de Beatificassión.
1943-1946		Procèssi apostòici a Roma, a Venèssia, a Mantova e a Treviso.
1951	3 giugno	Beatificassión drénto àea Basìica de S. Pièro a Roma.
1954	29 màgio	Canonisassión in Piassa S. Pièro a Roma.

Quirino Bortolato el xé nato a Salsàn (Venèssia) el 28 de febràro del 1946. Da vissìn ai studi sientìfici el ga sénpre coltivà, col ga possùo, ànca studi storici, igài sóra de tùto àea vita e a l'opera de San Giuseppe Sarto, S. Pio X, pàroco de Salsàn dal 1867 al 1875. Laureà in fisica nucleàre nel 1970, el ga conseguìo l'abilitassión par insegnare matematica e fisica néi istituti superiori e el ga dà el mèjo de iù al Liceo scientifico “Ettore Majorana” de Miràn (Venèssia). Adèso el xé ndà in pensión par ragiùnti limiti de passiénsa e de soportassión de tùto e de tùti. El xé sta tra i fondatori del boetìn parochiàe “Comunità nostra” (1968) e fra i rinovadóri del Museo de S. Pio X de Salsàn (1999). El ga sénpre coeaborà col Comune de Salsàn co ghe xé sta possìbie. El xé l'ideatore (1983) déa Fondassión Giuseppe Sarto de Riese Pio X (Treviso). Ciamà a Riese dal sindaco de quél ténpo, prof. Gian Pièro Favaro (che adèso el xé deventà senatore), el ga coeaborà ànca co sto Comune dal 1983 al 1999, e co la Fondassión dal 1985 al 1999, fin che no i ghe ga dìto basta. El coeàbora però ancora cóea Paròchia de Riese Pio X, che ghe dà spàssio so el so bimestràe “Ignis ardens”. El ga coeborà sénpre (e el xé ancóra disponìbie a coeaboràre) co tùti quànti quéi che ama l'onestà déa rissérca stòrica, sénsa racomandassión e sénsa condissionaménti né poìtici, né morài. El ga al so atìvo on mùcio de publicassión storiche e sientìfiche, curàe fra el 1973 e el 2002: qualchedùna xé ànca de na sèrta inportànsa par originaità de ideassión e de documentassión.

ultimo aggiornamento: 09.08.2007

I commenti e i messaggi sono di proprietà dei rispettivi autori, il resto © 2000-2009 dell'Associazione Culturale "Tempo e Memoria".
Questo sito è stato creato da Ermanno Baschiera in collaborazione con queste persone.